獨家丨張偉文坐太耐扭計:冇生日願望 71歲牛一獲Fans送壽桃慶生

「靚聲王」張偉文近年患上認知障礙症，加上腰患困擾要坐輪椅代步，所以長居護老院，幸得徒弟方俊照顧。上月21日是張偉文71歲牛一，當日方俊接壽星公出街鬆一鬆，除讓他唱歌供應「精神食糧」外，晚上更跟一班忠粉食飯慶生。唔知自己係壽星的偉文冇生日願望，他答得搞笑：「我乜都有，唔使許願咁老套。」採訪：方騫平

張偉文由老人院出來慶生。

壽星公話冇生日願望。

張偉文獲方俊照顧情如父子。

當晚，壽星和幾位忠粉食飯、吃壽桃及蛋糕慶生，幾位fans送上祝福利是。張偉文繼續有脾氣，坐得太耐冇嘢食會扁嘴，但見到頭盤有美味燒豬就笑返晒。講到生日願望，張偉文搞笑說：「幾十歲生日冇乜願望。」問到可想再開演唱會？他搖頭，但又補充唔係想退休：「啱做就做（唔開騷fans會好傷心呢！）唔會，一雞死一雞鳴！」方俊認為唱歌令偉文寄託，而且靠自己適量能力，做人會過得有尊嚴。今年4月方俊有意搞善慈騷，將按偉文心情及狀態，再決定會否安排他做表演嘉賓。

一班忠粉跟壽星公飯聚。

忠粉送上祝福利是。

晚飯期間坐得太耐唔耐煩，大嗌pat pat痛。

張偉文最愛食，對住乳豬開心晒。

張偉文返老還童

另外，張偉文還擔任網上音樂節目《星星相識》嘉賓，跟方俊合唱「飲歌」《風雲》及《問我》，自去年9月開完元朗個唱後，張偉文冇再唱過Live，雖然他近年多病痛，但唱功仍然深厚，觀眾留言表示好好聽及好感動。不過，𠵱家張偉文返老還童，做乜都睇心情，坐得太耐會唔耐煩，又會呻pat pat痛，唱兩句又會停低，狂食薯片及燒肉，徒弟即斟茶遞水𠱁老人家開心：「壽星大晒！」fans留言祝張偉文身體健康，還叮囑他食多啲，食得是福。

張偉文和方俊網上節目《星星相識》合唱《問我》。

張偉文唱兩句又放低枝咪食薯片。

方俊送上蛋糕為張偉文慶生。

去年9月張偉文完成元朗個唱。

仙杜拉在港時到過老人院探過張偉文。