【曾智華專欄】上順德搵周智豪

周智豪係邊個？你唔識㗎啦，睇落去啦！
　　
上世紀六十、七十年代，香港的電視廣告時間，甚多被香煙及酒類產品佔據，正因利潤龐大，故亦吸引到大量創作天才，度出無數經典口號，令人一聽難忘，從此深種腦海中，不自覺地去吸去飲。
　　
已經逝世的黃霑為箇中高手，單單一句「人頭馬一開，好事自然來」，即為這隻干邑創下當年的銷售紀錄，好犀利！
　　
香煙方面，「萬記」以牛仔及馬作代言宣傳，創造剛陽男性形象，一招萬馬奔騰，也將銷路谷至頂峰，令收入狂飆，理所當然廣告無孔不入。
　　
另一隻香煙口號也深入民心，正是—— I walk a mile for Camel，畫面見一個型男，不惜在烈日下步行一公里，就是為買一包心儀的煙。
　　
食煙非我杯茶，但這廣告，則令小弟明白，為追尋心中的理想，必須付出！例如食食食，為尋找美食，絕不介意「千山萬水」，專誠搭高鐵到潮汕食溫體牛、坐個多小時車到大灣區歎走地雞、飛過台灣尋找最頂級牛肉麵及到日本搵極品壽司師傅。當然，作為廣東人，日日歎茶及吃點心，我更希望找到精品。
　　
今時今日的香港，租貴、人工貴、材料貴，兼且人力資源不足，絕少具天分的年輕人肯由「廚房仔」及「點心仔」做起，再捱到變師傅。
　　
加上為節省成本，不少酒樓廣東點心，全皆來自大量製作的中央工場，味道極之「行貨」，令我這「點心迷」非常冇癮。
　　
最近拜長年在大灣區開廠的老友「班長和」帶挈，得知順德某酒店有好嘢：「碌Sir，食頂級廣東點心，去搵周智豪啦，必定食到舔舔脷！」
　　
周智豪究竟係邊個？為乜可以令我舔舔脷？
　　
紙短情長，明天繼續！