【曾智華專欄】打默契波，跑默契馬

火速踏入新的一年，祝大家2024年健康快樂，充滿安寧，齊齊繼續馬照跑。
　　
波與馬，一如股市與賭場，根本從來是個鱷魚潭，一旦加入金錢，全部就是真假不分的賭博。有人問：「喂，明知造假，你班友仲玩，係咪儍啊？」
　　
你話儍又得，看透世情又得。總之你租個場打波都要畀錢，如今有人開咁多「遊戲」畀你參與，只要你明白「遊戲規則」，就可以從中得到無限樂趣。邊個儍？若你真係以為賭波賭馬賭股票及入賭場會長期贏錢，唔使做都會發達，咁你就真係儍得好嚴重，應該去到要入青山的水平！
　　
上周睇新聞，見到中國足協負責人宋凱爆出個新名詞，真係絕，絕到我一聽即大聲叫「好」！然後興奮到跌咗落地，因實在精彩。
　　
乜嘢名字咁巴閉？正是——打默契波！佢話中國要堅決杜絕假波、默契波等行為。
　　
真係天才先會度出「默契波」這名字。
　　
小弟久不久就會贏場幾十倍的波，正因超級強隊包括拜仁、皇馬、巴塞、巴黎聖日耳門及些路迪等，在本國聯賽打橫行，因超強。但到時到候，就會「開飯」，揀一場「盃仔」賽事大打「默契波」，突然失手輸畀丙組仔、丁組仔，但奇在完全冇人會提「打假波」。原因？當然是All Win，所有人包括台前幕後，甚至「監管」者，皆從中得益，故一切早早有晒默契，大家扮「盲公陳」。
　　
馬場當然如是，點可能個個騎師及練馬師會安排馬匹場場「跑真」？儍咗咩！
　　
不過，明目張膽，好似「軟硬鞭」咁，連予馬迷有少少「默契」的動作都唔做，當然被鬧爆啦！
　　
元旦大賽，「鬼佬新年」捧鬼佬！蔡約翰強陣，「氣勢」𡁻硬，但冇肉食。「紅運帝王」有「加州星球」在，會分多幾蚊！