【曾智華專欄】咁叻？你貼隻Win睇吓

每次賽馬，我都捧星島集團的《賽馬日在線》場，並非因佢貼士特別準，而是夠輕鬆好玩，唔似官台般四平八穩，唧都唔笑（可能馬會規定啩），欠缺娛樂性。須知賽馬節目也是節目，忌太嚴肅。
　　
《賽馬日在線》主持有一習慣，不停答觀眾留言。這個有好有唔好，因網上世界乜人都有，包括Haters、暴民及變態一族，佢哋因可以隱姓埋名，故人性最醜惡的紛紛呈現，粗口爛舌不止，兼且會撩交打、撩交嗌，誓要搞㷫你。
　　
上季不少Haters明知安西教練唔襟激，於是成日玩佢、窒佢，搞到反晒面。小弟提議黃以文老總，一於Block晒班無聊搞事Haters。因班友見安西動怒，佢哋就更得戚，但正常觀眾好反感。
　　
好嘞，今季開始掂晒嘞。不過，仍間中有個別會搞事挑釁主持。例如早兩次貼士唔多準，就窒完一次又一次。終於有位主持忍唔住回應：「咁叻，你貼隻Win睇吓吖！」
　　
此話一出，小弟笑到跌咗落地。回想二十年前有兩個猛人，正正畀我要求貼一隻必有位置的馬，結果瘀爆。嗰日開始，我就告戒自己，千祈咪牙擦擦，因莫講冇馬必定勝出，連位置也可以非常高難度！
　　
當日我分別公開問法國著名練馬師賓康及馬會前主席李福深：「請畀一隻十拿九穩的位置馬我吖！」
　　
結果賓康面色一變，但在老婆大人面前唔衰得，只好畀出旗下最熱最勁一隻，而李福深就畀自己擁有的馬王「超捷」。結果慘情，全仆直！
　　
所以我今次挑戰班牙擦友：「咁叻？貼隻Win睇吓！」
　　
布文熱身一次後，今晚會「開工」啩？「國大合」越長越好，捧！
　　
「九秒九」一檔，邊線！「華麗活力」一千米已近，千二米可開飯！三隻皆可一博！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。