【曾智華專欄】「競委會」應考慮執笠

2012年出世的「競爭事務委員會」，成立時大鑼大鼓，給予香港人非常大期望，看似能夠趕盡殺絕「合謀定價」，還市場公平競爭一個機會。
　　
結果？十一年下來，一句講晒——得啖笑！入稟個案僅得十五宗，擺明此組織是「冇牙老虎」，故此冇生意，因氣頂市民寧願對不公的市場惡行吞咗算數，無謂浪費精神時間去求助競委會，反正必定得個桔。
　　
小弟真誠認為競委會與其存在又做唔到嘢，無謂浪費公帑嘞，執咗佢算啦，好等主席陳嘉殷抽身做其他「做到嘢」的機構好過。
　　
競委會被人最大詬病為完全郁唔到「油魔」，任其日日狂舞，明目張膽擺明「劃一定價」，真係盲嘅都睇到有人「打龍通」，但仍然冇辦法咬得入，吹到全港車主脹晒，個個怒火中燒！
　　
競委會永遠推話——難以蒐集足夠證據！
　　
犯案，例如兇殺案，當然最好有齊實據。但冇，也可釘得入，正是憑環境證供推斷，只得被告是唯一的兇手。
　　
有記者以非常長時間，耐心記錄香港五大油公司的定價，結論——離奇地一致！咁搞法，你話班「油魔」沒有「無形但堅實的默契」？儍的才會信！
　　
陳主席在無晒符下，竟推話外國查重大的合謀個案，也要三五年！
　　
老友，咁你究竟郁咗手未呀？競委會的出現，正因全社會怒吼嬲爆油公司撳住搶而成立，你搞咗八年仍不停用無聊藉口繼續拖？點解唔投降執笠？
　　
香港油價天咁高，背後有兩大原因：一、地租貴，人人知。二、政府大力抽水（稅），舉例我入一缸油付五百六十蚊，政府竟然再抽燃油稅一百七十五蚊！
　　
油價越高，政府越肥，這就解釋到點解冇人會認真對付「油魔」！