【曾智華專欄】阿積士狼死過拜仁

真真是「一狼還有一狼高」！
　　
上月底小弟在此講出一條間中執大錢的方程式，正是超班球隊於「奀盃」賽事作客，對着弱雞，分分鐘開飯唔眨眼，並舉例執咗場四十倍巨冷——拜仁在「德國盃仔」賽中作客「慘敗」（當然唔係真輸），丙組仔河魯貝根開出四十倍主勝賽果。咁玩法有冇手尾？有冇畀人抽秤？冇！情況就似我們的天王巨星「軟硬鞭」潘頓輸馬，監管者會突然變「盲公陳」。點解咁？天知地知，你我就唔知！
　　
冇所謂，早早話過波及馬自從可以開盤投注，當然假假哋，見怪不怪。故此，我輩落注，絕不純以實力論，間中要以「蠱惑」論。
　　
巨型班霸支出天文數字，球員個個億億聲身價，錢從何來？球壇老手黃興桂一句點破：「大佬呀！要出糧㗎！」球星出糧，幕後班大孖沙，甚至「監管者」都要出糧，明未？
　　
好嘞，一個月過去，終於小弟又扑中另一場四十倍勁冷！當然係盃仔！正是「荷蘭盃」，由丁組仔靴高斯主場出戰荷蘭班霸阿積士，就似侏儒仔對住六呎巨人。
　　
哈哈，我條方程式又中喇。阿積士真係睬你都儍，話輸就輸，「爆冷」（假爆冷）輸畀丁組仔二比三，於是小弟買十蚊又中四百蚊，牙都笑甩。阿積士比拜仁更狼，因拜仁輸畀丙組，阿積士輸畀丁組！服未？
　　
聖誕長假悶到飛起，好彩有馬跑，呢呢，今日又十場喇！一於專攻研究三班一千米直路！
　　
最佳馬膽為「怡心聲」，上季主攻一千米，戰績輝煌，兩W三Q二P，場場有獎金！
　　
今季大一歲，戰鬥力減弱，四仗皆輸，但上次入第四，復甦啦，今次會好近！
　　
腳拖「幸運之神」、「不可擋」及「攻頂」。另勁馬「包裝伯樂」突然改跑一千米，也要𥄫實。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。