【曾智華專欄】假如我申請投資移民

政府公布新資本投資者入境計劃（投資移民），一如所有國家，是明刀明槍吸水。
　　
投資移民，當地政府必有規限，限定你做乜、做物、唔做得乜、唔做得物。總的來說，希望你谷起經濟，提供就業機會，貢獻稅收⋯⋯為城市帶來好處而非負累！
　　
早年N咁多老友投資移民加拿大，政府指定你要做某啲生意。香港人過去，能做乜？做大生意驚煩到暈低蝕甩褲，於是為滿足條件，只玩「撳地游水」，有的做油站，有的做快餐店、小餐廳⋯⋯總之細細投資，瓜直算數，攞咗居留權再講。然後火速將盤生意似「交火棒」咁，搵下隻「移民水魚」接手，甩難！
　　
若要真真正正做盤生意才准你移民的話，可以好攞命。故此，我一睇特區政府呢個投資移民的要求，假若是小弟，真真——發達！
　　
雖然也有種種規限，包括唔准買住宅物業（即不得炒樓，以免搞到樓市爆升），但其他呢，非常筍，不少簡直是「冇得輸」，反之隨時執到（不是執返身彩）三幾成利潤。
　　
三千萬元，只有一項必須，就是向香港投資管理公司投入三百萬元，資金作為支持創科及有利長遠發展的重點行業。
　　
其他二千七百萬元又如何？要穩陣，切勿貪，忌買「高息債券」，因分分鐘中「恆大式死亡陷阱」！另外，切勿亂買基金，包括任何持牌商業機構的，因此行之內可以「盜匪如毛」，咪以為持牌的就是「宅心人厚」的「正人君子」。總之佢哋存在，記住——搵你錢而非替你搵錢！
　　
咁點投資最為佳選呢？我會二千萬元盡買特區政府發出的一切債券，因零風險，再有利潤。
　　
另外七百萬元買入：中電、港交所及國泰航空，呢三隻乃政府唔畀得佢「冧」的鐵股，知冇？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。