独家丨唐唯瀚导演感谢张家辉引荐 拍《爆裂点》有林超贤带住似上大师班
唐唯瀚首次执导电影《爆裂点》，便拍着监制兼总导演的林超贤及张家辉，作为新导演觉得好幸运，他感激林导以身教形式全程带着他拍摄，好像读了个大师班一样；而相识15年的张家辉更亲向林导引荐他，促成今次合作机会，回想过程也觉梦幻。采访：杜杜
唐导自演艺毕业后，20年来主力为陈木胜导演担任副导演，每套戏均由前期跟到后期，两人关系就像师徒，而2003年他首度为林超贤执导的《豪情》任副导，在两大导演身上都有不少得着，“虽然佢哋都钟意拍警匪、动作片，但钟意嘅嘢好唔同，不过佢哋𠮶种坚持、执着同胆量都好似，觉得𠮶样嘢啱就会去到尾。”而陈导和林导教后辈的方法亦好相似，“佢哋唔会话畀你听应该点做，要靠自己观察同吸收。”
林导出手补拍学到嘢
“魔鬼导演”林导出名要求高，唐导就好享受跟他合作，“我唔系畀人呵大系俾人打大，惊咩！？最紧要大家做到嘢。”作为电影总导演的林超贤，除了拍摄外，还每日帮唐导睇片，令他获益良多，“电影尾段谭俊彦同张家辉喺水道互片𠮶场，我同董玮（动作指导）已经拍咗，但Lam导补拍咗半日，佢冇同我讲要点拍，但佢补拍𠮶阵我喺度，就知道自己差啲咩。”他形容拍摄过程似master class，要鸣谢林导的付出，“要借呢个机会多谢佢，佢自己又要拍，仲要睇埋我啲嘢㖞！好甘㗎！一个咁劲嘅制作仲要孭住我行唔容易，边个肯咁样帮你！？”
得到难得机会，唐导感谢张家辉帮忙，两人早在2008年合作《保持通话》认识，“套戏家辉做交通警，好奇怪拍完之后佢一路有揾我，仲将我引荐畀Lam导，演员介绍一个副导演畀另一个导演识，真系好梦幻，𠮶时佢都未知我同Lam导本身都识。”事隔好几年，家辉跟林导聚会时又提起他，“家辉话值得撑吓我，Lam导都知道我系咩人，咪促成呢件事囉！”
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
