【曾智華專欄】勿搞出悲劇才收手

近日的香港，在各方力谷之下，不少大型活動頗具睇頭。例如早前星光大道的LV Show，真真正正做到星光熠熠，絕對可吸引全球名牌排隊到港照做。呢類活動絕對不用政府插手，只提供政策上「方便」便可。
　　
另外，馬拉松、演唱會、巨星球賽排隊出籠，真係——咁至似香港！
　　
冇乜聲氣多年的工展會，今年一開波，也見氣勢。一如本報上周日大標題形容：《工展會首日市民震撼式消費》！
　　
今次工展會有成九百個攤位，有酒飲，有美食，有平嘢，完全可以吸引最大公約數香港消費者，亦可能吸引到內地人南下，掃唔使擔心「假嘢」的香港著名品牌。
　　
今年工展會開波，的確勁。不過，也睇到我一額汗，對住新聞，不禁自言自語：「喂，下次唔好再搵啲咁嘢搞啦，分分鐘發生悲劇㗎！」
　　
乜事呢？正是工展會為造勢，度出「一蚊鮑魚福袋」，早早宣傳，當然會有不少草根消費者摩拳擦掌——搶嘢！
　　
咁鬼著數，坊間一傳十，十傳百，吸引大量市民，不少是草根長者，早早結集門口，以便一開門就標入場搶購福袋。
　　
於是大家就見到一個非常危險、你搶我奪、前仆後繼場面。結果出現有人跌到一仆一碌，今次好彩冇事，但試想想，若跌倒者為高齡阿公阿婆，咁隨時會斷骨崩鼻，危及性命，若真發生，成個工展會立即冇晒意義，兼且中華廠商聯合會更會即時被千夫所指！
　　
玩「衝入場」，只合年輕人搶電競產品呢類活動，佢哋仆低可以即刻彈起。
　　
但七老八十的工展會客，絕對玩唔起！工展會要宣傳，不如宣傳「工展小姐」選舉啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。