【曾智華專欄】生壞命，改壞名

俗語有云：「唔怕生壞命，最怕改壞名。」
　　
現役馬中不少馬主相當有修養及有學識，能在馬匹命名中反映出來。
　　
上賽本欄提供貼士，直路賽一拖三，以大熱馬「賢者無敵」行頭，拖「當家精神」、「精靈勇士」及「狀元及第」。結果幸運地命中Q，熱熱哋派七十九元，有倍多利潤，唔錯㗎喇。
　　
「賢者無敵」寓意好，夠正氣，令人聽得舒服，賀賢練馬師賽馬團體中有改名高人。此馬真犀利，今季出三場全勝，仍遠未見底，再出也要捧場。至今出六場已贏超過七百萬元獎金，跑直路一千米暫仍無敵！同場曾經是一千米明星的「實現夢想」，上季三出三勝，今季四出四冇影，唔知壞咗邊瓣！
　　
講返馬匹改名，年多前有位馬會高層大P拉我講：「碌Sir，呢匹馬大鑊，改壞名！」
　　
「邊匹？點壞法呀老友？」
　　
「正是『喜報圍家』也，真係不倫不類，身邊班抵死友個個哈哈笑，替佢改咗名做『起步為艱』，感覺相當不利。馬匹名字可以好邪，唔知點解會影響馬匹命運。例如政治馬名、低俗馬名及不利諧音馬名，皆⋯⋯以前有匹『釘囉』，你可記得？由英文Danelaw直譯，結果真係⋯⋯」
　　
大P講時，為去年年底，「喜報圍家」剛出賽。至今跑咗十六場，不但冇W冇Q，且場場追都唔追，上周又輸七個幾馬位，跑第十。試過由八位騎師出策都食白果，問你服未？
　　
今晚我再研究當紅炸子雞伍鵬志部署，上賽佢又三W，你邊有得唔服。
　　
第七、第八兩場千二米，佢皆用巴度，因做到輕磅。「添開心」今季出三次，兩W一第四，極準，排四檔，做膽！另一隻「闖一」，排九檔，應半冷，今季出三次兩第四，蹄聲漸近，上季的一W，也是由巴度經手，大家存記！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。