頭條戲場丨《斷網假期》現代人真係好廢

由Julia Roberts、Ethan Hawke及Mahershala Ali合演的末日驚慄片《斷網假期》，12月8日於Netflix上架即登上英語電影收視榜首，有奧斯卡影后加男配孭飛，加上《黑客軍團》首腦Sam Esmail自編自導，受歡迎都好正常，不過，Netflix最鍾意搵巨星拍爛片，中伏過無數咁多次，睇觀眾評論證明冇估錯，「爛番茄」好感度由剛上架的75%急跌至截稿前的34%，反正最鍾意挑戰爛片，片長141分鐘，抱住頂唔順就熄機心態，竟然唔覺意睇晒，懸疑點有新意，又有大量反思位，結局有幸福感，其實唔差，可以短啲更好，真心幾好睇喎。(已上架) 圖片提供: NETFLIX  撰文:廖思慧  
 

兩家人都係知識份子，但面對斷網斷通信完全無能為力。

屋主深夜拍門，係咪一定有古怪?

兩家人未知事態嚴重，仲有閒情飲酒吹水。

有知識的中產夫婦Clay（Ethan Hawke飾）及Amanda（Julia Roberts飾）帶仔女到長島度假，到埗冇耐已有怪事發生，先在海灘遇上郵輪擱淺，個心仲驚緊之餘，返高級民宿後又發現冇晒網絡，電話打唔通連電視都睇唔到，大人自我安慰覺得暫時性，細女Rose (Farrah Mackenzie飾)最唔開心，因為佢係經典美劇《老友記》Fans，爭結局未睇周身唔聚財，雖未至於如《家有喜事》的琴姐，冇電視睇會大叫，但不斷追住叫老竇「整好個網絡。」，煲開劇的人代入感必定好強，如我。

G. H.租畀Clay一家的高級民宿，係正嘅。

中產夫婦的一對仔女，阿哥好怪，阿妹更怪。

因為上唔到網，阿妹睇唔到《老友記》結局。

阿妹一早覺得郵輪唔妥，觀察力相當強。

因為架車冇導航，Clay爭啲返唔到民宿，同時發現Tesla玩攬炒。

民宿主人房幅牆畫原本風平浪靜。

自斷網後，牆畫跟據男女主角心情變成驚濤駭浪。

斷網後不時傳出刺耳噪音，可震裂玻璃。

話咁易製造全民恐慌
然後聲稱民宿屋主G. H.(Mahershala Ali飾)及女兒Ruth (Myha'la飾)突然深夜拍門，表示紐約停電未能返歸想在民宿借宿一宵。兩個家庭、三個大人及三個細路身處斷網環境，周圍冇晒人，以為有殺人狂或外星生物偷襲?係冇嘅，又以為有成堆隕石襲地球?都係冇嘅，電影有別一般末日片，災難來自主角面對未知嘅零反抗能力，通信及網絡突然切斷，人與人之間互相猜疑，再陷入內鬥，現代人其實好脆弱，即係廢。

G. H.出外搵鄰居，見到飛機衝落海。

阿妹一早見到鹿群離開，但父母冇理佢。

因為導演在電影中提出問題但最後冇解答，開放式結局惹來觀眾海嘯式粗口問候，念力可大可小，願導演安好。電影懸疑感來自未知的恐懼，最怕睇懸疑片見到蠢人做蠢事，慶幸呢套冇，全片最細的Rose最挑通眼眉，一早發現鹿群發出危險警號，結局跟住妹妹會心微笑，I Know That Feel 。

電影在12月8日於Netflix上架即登上英語電影收視榜首

《星島頭條》新網站有更多精彩內容：http://www.stheadline.com/