【曾智華專欄】奧斯卡影后鬥演技

期待已久的電影，上周第一日上畫即衝去睇，邊套？慘⋯⋯埋到售票處，根本噏唔出片名！點解？就是無法全部讀出，只好講：「我想睇《五月》！」
　　
其實此片全名是《五月的你，十二月的她》，若不知背景，百分百一嚿雲！
　　
片名其實相當影響觀眾入場意欲，例如《富都青年》，我不停向老友推介，但十個有七個皆問：「乜片嚟㗎？」
　　
「金馬影帝吳慷仁得獎之作！」解釋再解釋，才逐個慢慢明白。
　　
今次呢套《五月》，卡士更犀利，有兩大奧斯卡影后擔演——茱莉安摩亞及妮妲莉寶雯，理所當然屬資深影迷必睇之作。
　　
點解個片名咁騎呢？首先要講英文原名《May December》，含意是5月（盛夏）及12月（冬去），代表片中兩個靈魂人物，年輕正值陽光年華的丈夫及開始日漸老去的妻子，深具含意。
　　
此片劇情若非根據真人真事改編，外間必指大話西遊，編劇亂作。因描寫一位三十六歲，擁有幸福家庭，包括丈夫及子女的漂亮人妻，竟愛上一個韓裔初中生，並發生關係，繼而懷孕，是否匪夷所思？
　　
結果女的被判強姦，入獄七年，但卻決定在獄中產子。而初中生則等足七年，當女的出獄後，正式結婚，組織家庭，再誕下孖女。
　　
故事絕非憑空揑造，而是根據1996年一宗轟動美國的瑪莉凱勒事件（Mary Kay Case）改編。
　　
當年任女教師的瑪莉與十二歲學生維利（Vili Fualaau）相戀，發生性關係，誕下兩女兒。結果瑪莉被判強姦，入獄七年。2005年出獄後，與維利正式結為夫婦，婚姻維持了十二年。
　　
《五月》將這件驚世駭俗個案改編，再加上妮坦莉寶雯以女演員身份發掘畸戀內情，欲搬上銀幕，爆出段段火花，精彩！