【曾智華專欄】退休高官忌入商界

年尾年頭，特多飯局聚會，有的舊同學，有的舊同事，有的同業老友，也有的是同聲同氣同信念同價值觀的江湖友好。
　　
飯局中，除互相問候報報近況，晒吓去過邊度旅遊食好嘢之外，當然提及邊個「走咗」（外地或天堂），然後少不免欷歔一番。
　　
退休多年的公務員老友，全由港英時代親身體驗回歸後的一切，百般感受。講起昔日，個個口噏噏《每當變幻時》——「懷緬過去常陶醉，一半樂事，一半令人流淚，夢如人生永記取，悲苦深刻藏骨髓⋯⋯」
　　
小弟性格與大部分人有少少不同，只喜歡唱羅文的《家變》——「知否世事常變，變幻才是永恆，始終波浪起跌，當然有幸有不幸⋯⋯」，以及《獅子山下》——「人生中有歡喜，難免亦常有淚，我哋大家在獅子山下相遇上，總算是歡笑多於欷歔。」（視乎不同年齡！）
　　
前晚與退休高官老友相聚，有的移民回流，有的回港度假，有的日日「享受人生」（即無所事事），有的忙於慈善義工，有的再戰江湖，其中一位阿B闖入商界，打大財團工，身光頸靚，但灌兩杯後滿肚苦水。
　　
「喂，成千萬元年薪喎B佬，扮痛苦？」在座有人玩吓佢。
　　
「唉⋯⋯入咗商界才知，大富豪真係冇死錯人！之前交往，必恭必敬，乜處長前、物局長後，但一變上司，猙獰面目即浮現，冇面畀！之外，做公務員一切有規有矩，但商界唔知乜叫規矩，總之唔犯法就做，經常踩線。老老實實，我頂唔順喇，決定年尾走人，以免唔覺意中正刑事，長俸都冇埋！」
　　
「大家幾十歲人，點可唔知大老闆畀千萬元年薪你，原因純希望利用你之前政府關係，賺返起碼一億元，你估同你有親咩！」我細細聲窒佢幾句。