【曾智華專欄】你問我，我問邊個？

廣東俗語好過癮，也抵死，通常不會直講，要你猜猜。例如明明係「唔知喎」，早年就流行話：「你問我，我問邊個？」
　　
後來報章專欄作家曹仁超，也有個新名詞——木宰羊。初初寫時，讀者當然知佢意思是「唔知喎」，但冇人知點解變咗「木宰羊」。
　　
於是小弟就四出問問問，終揭開謎底。原來「木宰羊」是福建語（閩南語）中的「唔知道」，正確讀音是「磨寨哎」，畀曹仁超鬼鬼馬馬轉做廣東音，即變成「木宰羊」了，大家明白未？
　　
不過，流行語言也會有變不流行的一天，故此，近年已少有人再用「你問我，我問邊個？」或「木宰羊」，來表達「唔知喎」。
　　
今日講起兩句曾經流行的用語，因自從小弟指出，《香港國際賽事》中那場二千米「香港盃」，日本隊代表「先見」純粹輸在騎師渣波，就算用到日本冠軍人馬川田將雅，仍無法將「先見」的潛藏盡情發揮，搞到應贏而輸。
　　
馬迷老友睇完巡邏影片，紛紛認同。但又有個疑問：「點解日本育馬及練馬水準咁高，但騎師質素則咁渣波呢？」
　　
即時兩句古老形容詞彈入腦：「你問我，我問邊個」及「木宰羊」。
　　
其實香港也有這現象，就是本土練馬師犀利到橫掃三項國際大賽（文家良、沈集成及呂健威），而當今在練馬師榜拋離前領的，也是本地薑伍鵬志，咁點解香港騎師的成就，仍比過江龍差一截，搞到要讓磅呢？
　　
認真做研究找答案，可以是一篇博士論文！
　　
明天賽事，最有興趣研究二班直路賽！
　　
「賢者無敵」在上升軌，今次雖冇咗布文，但也不應由龍變蟲！對手有「精靈勇士」、「當家精神」及「狀元及第」。昔日明星馬「實現夢想」究竟幾時能跑回水準？真「木宰羊」」也！