【曾智華專欄】亂過馬路漸進罰款

警方本周起在全港進行大型執法行動，派出軍裝及便衣警員，無限期檢控亂過馬路行人，一經定罪，最高可判定額罰款二千元。
　　
二千元對一般普羅大眾來說，真的「唔係嘢少」，非常重錘。不過，在香港亂過馬路情況實在嚴重，有晒數字顯示，政府絕不可坐視不理，必須做嘢！
　　
單單今年頭三季，已經發生七百一十五宗致命及嚴重受傷交通意外，數字驚人，當中涉及行人交通致命人數約五十人，即被車撞死，而六十五歲或以上的長者佔三十一人，即六成，這個倒是估計之中。
　　
點解長者特別容易被車撞倒？小弟每天揸車到處去，大概一至兩小時，真真見盡不少途人亂過馬路，而當中正正大部分屬長者。
　　
佢哋年紀大，行動緩慢，更因體力問題，加上貪方便，很少願意用行人天橋或行人隧道。就算行多兩步，用斑馬線及有交通燈控制的過路處，也不願意，不少即興話過就過，唔理喺邊，兼且也唔睇交通燈，個別神情恍似——睇你夠唔夠膽撞埋嚟咁款。
　　
正因如此，不少被撞的行人為長者，是一個「正常」現象，但必須解決。
　　
票控亂過馬路行人，理所當然，必定大量長者中招，因眼矇耳聾，就算明明有軍裝警或便衣在監視，也可能睇唔到。另一點，眼明手快的年輕人，就算被警員喝住，也可扮聽唔到，「殊」聲走咗去。
　　
基於老人家最易中招，佢哋又唔多接觸媒介，不知警方如此大陣象，若一嘢就罰二千元，實在太惡頂。小弟建議循序漸進啦，頭一次犯罰五百元，再犯罰一千元，第三次就罰二千元，等佢哋知肉痛，自然會守法，毋須一次捉到就二千元咁「大刑侍候」嘅。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。