【曾智華專欄】公平公正，口服心服

任何比賽，賽例必須公平公正，如此，參與者無論勝負，才會口服心服，而比賽本身也能累積極高公信力，令各方稱讚！
　　
《香港國際賽事》正是最佳例子，港隊四項大賽中橫掃三項冠軍，全無外隊抗議或挑戰賽果，因屬技術性擊倒！
　　
當日畀何澤堯譽為「神獸」（Monster）的「金鎗六十」，彈離勝出，贏到收韁。
　　
另一隻「金鑽貴人」也如是，外隊根本冇得跑。呢場犀利到香港馬包辦頭五位。其他四隻外國代表，輸四至六個馬位！跑千二米輸成咁，究竟下年仲有冇馬敢來？賠了夫人又折兵也。
　　
港隊唯一幾乎W唔出的，是「浪漫勇士」。「論武功，俗世中今天邊個高」？論騎功，明顯「天下第一高手」莫雅高麥道朗少少，麥道朗贏的是馬而不是騎功！呢場其實日本馬「先見」絕對有機會問鼎冠軍，輸乜？純粹輸騎師。日本馬近年質素相當高，但日本騎師根本配合唔到，喊都無謂。大家唔信，可翻睇巡邏影片，就知呢場其實係人而唔係馬分勝負！
　　
上周日第十場其實也非常精彩，欣賞價值在看艾兆禮如何掌握步速，在千四米半短途賽事中，出閘扣在第九力留，忍到最後一百米，才爆出馬匹驚人能量而W出。
　　
呢場練馬師的部署也冇得唔讚，今季的伍鵬志，真材實料，至今贏到三十一場，在練馬師榜遠遠拋離，絕冇半點符碌。
　　
記住，佢至今仍未有一隻超班大賽棋子，已有如此成績，推斷未來將有更光芒的日子。
　　
跟紅頂白，今晚快活谷賽事，我每隻十蚊雞，投注以下伍廄馬：「海藍寶」、「皇仁福星」、「但求快活」及「無敵精英」。用四十蚊換來四次興奮，可能有得大嗌特嗌——上、上、上！