【曾智華專欄】雞湯大戰益用家

老老實實，小弟經常會變「婆仔」（絕無貶意！），即四周圍格價。尤其每逢星期五，必定將《星島日報》逐版揭，睇睇各大超市集團有乜平嘢。
　　
我最留意三種商品：一、紅白酒；二、梳打水及汽水；三、雞湯。
　　
點解連雞湯都咁着緊？皆因多年前已開始拒絕用「毒藥」（充滿化學調味品的即食麵湯包）煮麵，因一啖入口已喉頭火燒，兼且唔使專家講都知，呢種邪妖味甚重的化學湯，有害健康也，事實也絕不好味。
　　
故此，花費多一點都要，就是改用盒裝的清雞湯。一半湯，一半清水，已非常好味，絕不會令人口渴，飲得放心舒服。
　　
事實不少高級食肆近年已戒用味精，因嘴尖客人一啖入口就知。至於改用雞粉，效果也不是最好。不過，若自己煨上湯，則極花時間與金錢，故此，最佳方法用清雞湯。
　　
雞湯市場增長速度非常驚人，一直以來都是史雲生彈離領先，亨氏第二。早年超市集團見需求咁勁，自己又出。
　　
但咁搞法，一方面與批發及出品商直接利益衝突，另方面，你唔係專家，點夠人鬥？
　　
我試過買超市自家出品，差得多，一啖入口已掉得，咪搞，平三兩蚊根本完全冇競爭力。
　　
上周五早上揭報，嘩，犀利，有隻超勁牌子開始殺入雞湯市場，正是本來強項屬出雞粉與雞精的家樂牌。
　　
其實我一直唔明，點解佢哋作為「雞味」霸主，冇早早揮軍落場競爭，結果畀位史雲生獨霸天下？
　　
如今一係唔出手，一出手就全版廣告，鬥平，平到三十五點四三元三公升（一般要四十二元九角至五十一元，上個舊曆年底更曾去到五十七元）。
　　
嘩嘩，有競爭，有進步（噴血劈價），此時我當然大力掃貨，以免「蘇州過後」呀。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。