【曾智華專欄】威過應家柏總裁

周三《國際騎師錦標賽》，十二位高手過招，極度有欣賞價值，但賽果有點意外。
　　
第八場跑完，手機立即彈出「恭喜」信息。來自老友「抵死B」，貫徹衰衰的作風：「碌Sir，恭喜你喎，貼士威過四千幾萬元年薪的馬會總裁應家柏，真犀利呀，以後貼多啲，等我唔使買呀，哈哈！你聽日要食兩餸飯喇！」
　　
丁死仔當然在講反話，因周三本欄貼士全部瓜直。我以實力論，睇好五大高手，包括莫雅、麥道朗、馬昆、杜苑欣及潘頓，四場錦標賽，用五位二重彩複式二十注買。結果只得潘頓及莫雅中W，其他三個非常「難得」地食白果，立時所有投注報銷。
　　
咁點解「抵死B」話小弟威過應總呢？因在排位當日，應總在眾多中外記者面前，揚言睇好自己家鄉（德國）冠軍騎師毛振鵬奪冠。
　　
結果？開呀！此君跑四場，全部變「無影俠」，連一席第四都冇，所以，咪搞到出現我的貼士威過四千幾萬元年薪的馬會總裁囉！
　　
畀人窒完，舒服晒，跟住再刨明天國際大賽，又係買唔中都歡喜死，高手勁馬齊過招也。
　　
明天四場大賽，馬迷當然希望本地薑捧盃。但一如以往，二千四百米的香港瓶唔使諗喇，因香港甚少長途賽事，故冇這方面的馬王級，屆屆都睇住外隊執錢。今屆日本馬超強，尤其「輕風飛」及「生活格調」，凡出賽皆四名內，實力仍未見底！
　　
其他香港馬王，也非冇得輸。「浪漫勇士」10月搏到最後一滴精力贏覺士盾，要幾耐恢復元氣，難以估計。「金鎗六十」已經八歲，出戰二十九次，里程用得七七八八 ，正部署退休，黃金期已過。「加州星球」演出飄忽，上次大敗。
　　
總結，香港隊只得「金鑽貴人」最具勝望。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。