【曾智華專欄】嚇鬼死與嚇到瀨尿

昔日《晨光第一線》電台拍檔侯嘉明（Alyson）上月傳來信息，要求捐款支持，搞乜？正是佢為挑戰自己，決定冒險接受一項非常驚險大行動，在一千呎高的港島東中心（One Island East）游繩而下，為訓練有志突破自己極限者而設的「香港外展信託基金」（Outward Bound Trust）籌款。
　　
我一睇，心諗：「嘩，乜搵啲咁嘢搞呀阿妹，你已就快四張，又係三女之母，有乜需要搵啲咁危險嘢挑戰自己呀？老公阿Paul又點睇呀？幾個女又贊唔贊成呀？」
　　
但冇直接問佢。捐錢當然冇問題，不過，如此搵命博，會否臨陣縮沙呢？又會否中途殺出有影響力的人（例如佢阿媽）喝止呢？
　　
時間一日一日過去，佢目標為籌二萬元，好快已有一萬一千元，睇嚟勒唔住，要去馬嘞。
　　
好啦好啦，完成佢願望啦。決定將「慈善同學會」船記飯局善款九千八百元捐晒畀佢，咁就一次過即達目標（最後共籌得四萬幾元）！
　　
行動當日，嘉明由老公與三個女陪伴，摸黑於凌晨出發，六時前已上到一千呎高的港島東中心天台，由醫護替佢先量血壓、心跳等等，再由專業人員逐一綁好安全繩。
　　
然後在真真正正晨光第一線射出前，游繩而下，當天風勢頗大。
　　
上主保佑，最後安全著陸。我去電問：「你有冇嚇到瀨尿呀？」
　　
有此一問，因的確見過不少挑戰高難度者真真正正瀨尿。早年在布吉島見證N個遊客以為好過癮，坐飛天傘由快艇一拉，即刻扯上幾百呎高空，之後慘叫連連，到降落時，真真正正一褲都係！
　　
執筆此稿前兩日，哎吔吔，又見一日籍漢在澳門玩「笨豬跳」，落地後冇晒呼吸及心跳，瓜咗！所以，自己知自己事，咪亂逞一時之快！