【曾智華專欄】《不日成婚2》充滿情趣

睇電影，當你有共鳴時，就會跟隨主角的情緒或喜或悲，或笑或哭。這種「享受」，日常生活無處尋，故此，電影能成歷久不衰的商業產品。
　　
剛剛睇完《不日成婚2》，也正正有齊上述感覺，真的很正，未睇的讀者快睇！
　　
電影第一場已笑爆嘴。白只偷食完之後，High到斷咗片，老婆通宵追魂Call全唔覆，醒後在五星酒店豪華套房中，苦思應點交代。結果，僱用一位度「橋」專家，替佢砌出合理藉口，橋段夠晒絕！不能劇透。
　　
然後三個男主角出場，包括陳家樂、朱柏康及岑珈其，幾個老死的對話，相信能令所有港男，不分年齡，皆有所代入。尤其是有關「九叔」一段，更夠晒抵死（明就會明）。
　　
此片靈魂當然是編劇及導演陳茂賢，佢除百分百掌握男性心態外，更能將戀人、夫婦、婆媳⋯⋯等複雜人際關係，到肉地寫出及拍出。尤其臨尾一段扮演奶奶的金燕玲與扮演新抱仔的衛詩雅交心對話，更顯陳導演的深度。
　　
電影完後，踏著愉快腳步離開戲院，才醒起⋯⋯咦，呢套係「2」，咁「1」呢？未睇過噃。速速回家在影視平台搜索，好彩，有！速煲。
　　
作為港產片的擁躉，小弟覺得近期非常幸運，因套套上、套套精，且全有深度、全有訊息，相比上世紀七八九十年代的本土電影水平高得多。當年不外乎只得屎尿屁、黑社會、警匪片及周星馳系列的無厘頭片種，來來去去走不出中下層次的品味。但去到近兩年，新一代的編劇及導演爆出，拍攝由技法到闊度、深度，皆有明顯提升。點解呢三年突然會如此跳級？與社會環境的變化，可有直接關係？不少人話「香港無望」，我絕對唔係咁睇。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。