【曾智華專欄】一呼百應包場後

上周五手痕，爆咗位資深影圈人的提議：「碌Sir，你可否搞個『跟住碌Sir去睇戲』群組，幫吓艱苦經營的本土電影業？」
　　
本欄見報後，再掟上社交平台，嘩嘩，立即體會乜叫一呼百應！
　　
有傳媒友好、有電影監製導演，更多是小弟的「追蹤者」（未必是粉絲）紛紛彈出叫好，敦促快快搞，唔好齋噏。
　　
最有趣是提議多到不得了。最正路的要求搞到充滿歡樂氣氛，首先包場（未知如今市道，邊個時間、日子或邊個區最經濟？）。然後，導演及主角到場，謝票及開座談會，解釋電影背後的信息、拍攝過程的甜酸苦辣，演員也講講如何揣摩角色的神髓。
　　
當然現場要有答問環節及大合照，令大家更投入。
　　
以上正路，但不太正路的，也湧出大量「期望」，最多的是：「碌Sir，淨係睇戲，齋啲噃，可否包場之後，齊齊操去歎Good Food呀？由你帶隊，殺去不同食肆，例如樂富中心海鮮城歎手打墨魚餅、鯉魚門豪門食頂級海鮮、船記品嘗和哥叉燒、順德公見識生劏花錦鱔子薑欖角清蒸、喜萬年整碟荷蘭母豬肥生腸、陸羽來鼎生磨杏汁豬肺湯、瑪寶鮮整煲古法雙冬羊腩煲、小皇府來碟粥油白灼黃沙潤，若再豪啲，就去埋富臨歎一哥鮑魚或到家全七福見識吓七哥的即燒乳豬全體⋯⋯ 」
　　
嘩，原來小弟啲擁躉咁鬼為食又想像力豐富！好，一於粗粗哋試吓組織一次，等我先搜集包場有乜條件，因矇查查也（搵食乃小弟強項，一定掂，唔使擔心）。此外，也應該將每次出擊化為慈善活動，令其更有意義，一於每人捐一百元畀指定慈善機構！
　　
幾時開波？等有套值得搞的電影先啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。