【曾智華專欄】多謝你鬧爆我

近期最多人談論、追睇、鬧爆⋯⋯甚至嗤之以鼻的劇集係乜？唔使由公眾直選投票嘞，一定係，也理所當然係——TVB劇集《新聞女王》！
　　
次次飯局，凡有新聞工作者在場，無論老中青的、現任或退休的，皆一致咬牙切齒，好似想打爆電視機咁㷫。點解？你睇吓咪知囉（免費幫手催谷收視）。
　　
講真，小弟半點不動氣，因《新聞女王》話明係戲劇，又唔係紀錄片，自由創作大原則下，點解唔可以天馬行空亂作一通？
　　
尤其操控權落在總監製鍾澍佳手。商業誇張劇，佢乃專家。由1988年開始，已寫、拍、監過N部電視劇及電影，對於通俗煽情有精準掌握。
　　
講都唔信，其實佢曾化名「鍾晴」，於2006年及2007年拍過《大丈夫2》及《七擒七縱七色狼》。呢兩套係乜嘢片，大家上網一查就知！所以，由佢監製《新聞女王》，點會有嚴肅的新聞元素及學院式的新聞原則？
　　
不過，對普羅觀眾，尤其是無記的基本擁躉來講，新聞準則絕非佢哋想知想睇的。追看劇集原因，只問劇情是否夠爆！最好劇中人爾虞我詐，日日只搞辦公室政治，唔係你死就係我亡，個個不擇手段，咁就為之Very Good嘞。
　　
昨晚與兩位正氣退休老總晚飯，當然又係將《新聞女王》鬧爆（咁㷫，點解仲睇？）。
　　
「老總S」較理智，話：「其實套劇應該之前做多點資料蒐集，因為當年電視台競爭最慘烈及『多姿多采』的，並非內部山頭，而是無記與亞記的血戰，若能拍成劇，再加鹽加醋，肯定收視將似火箭升空！」
　　
我即時諗，若果有人拍一套《電台女王》，以俞琤做藍本，血戰「DJ之父」吳錫輝，也一定精彩到癲！因必涉及樂壇幕前幕後的超級八卦料啊！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。