【曾智華專欄】拜仁搵食潘頓「唔食」

本周有幾項投注事項，相當有趣：
　　
一、拜仁又「開飯」。大家可記得上月本欄一篇《德國班霸表演輸波》？文內小弟揭露一條長買長中的「班霸開飯」規律，當中拜仁為最鮮明例子。通常兩個情況下，會「無情情」對著弱旅和波或更離譜地輸波，爆個石破天驚！
　　
上月「開飯賽」是作客對著丙組仔河魯貝根「慘敗」，開四十倍主勝！之後當然回復正常猛贏，包括歐聯。不過，本周三拜仁又有「開飯賽」，因在歐聯已大幅拋離對手，攞硬頭位出線，咁仲唔開飯就唔係拜仁啦！一睇，主場對哥本哈根，和七倍，客勝十二倍半，開心死。唔使諗，大注「藕」落去和及客勝。超強隊，你想佢輸好難，但整蠱做怪唔入波就好易，結果？零比零！幕後又有排食嘞。
　　
二、潘頓繼續「唔食」。廣東俗語——有食唔食，罪大惡極！大家應意會，唔使解釋。但在當今馬圈「隻手遮天」、「目中無人」，唔怕令監管小組尷尬的「軟硬鞭」潘頓，則反其道而行（原因心照），雖則遇上八萬馬迷群組公開信質詢馬會，仍然當你班友儍，不停陣上「望馬腳」，「唔食」，吹脹乎？
　　
今季賽事投注急跌，可能有好多原因，但肯定「潘頓失蹤」是一大令馬迷拒絕投注原因，且看馬會點回應馬迷怒吼？
　　
三、周三貼士執返身彩。當天本欄指出第八場只得六隻馬跑，結果有五隻排隊返來，只得一隻「軟硬鞭」的「四季醒」玩失蹤。
　　
明日沙田戲碼麻麻，泥地賽趕客。
　　
研究第八場三班一千米，選定三匹：「怡心聲」、「閃電烈馬」及「攻頂」，三匹皆有一千米直路賽績。
　　
第一匹純捧偶像麥道朗；第二匹馬只服賀銘年，失驚無神就會爆；第三匹一千米專才，前列歸來！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。