【曾智華專欄】跟住碌Sir去睇戲

人生其實不用太多刻意規劃，反正你想的未必得到，你未想過的，有可能無端白事彈出，一切恍似早有劇本。
　　
例如小弟讀中學時，家父當然想我讀理科，然後做醫生或工程師。
　　
不過冇天分就是冇天分，物理、化學統統考試肥佬，點搞？冇得唔投降。轉讀文科？又是一竅不通，睇見本書只想瞌眼瞓，又唔掂。
　　
終於誤打誤撞走咗去美國讀四流大學，咦⋯⋯乜有科叫做Speech，唔使考筆試，齋噏已掂，如此才發覺自己有「噏嘢天分」。
　　
終於「噏出彩虹」（當然要有腦！），靠在電台開咪養妻活兒、供樓買車，兼得到少少江湖地位。
　　
一切有冇刻意規劃？冇！
　　
好嘞，三十多歲開始學人投資，結果蝕到血跡斑斑。終於五十歲才開始認真鑽研金融世界的蠱惑，學懂趨吉避凶，終在六十歲前獲得財務自由，安穩過著冇經濟問題的退休生活。
　　
又再誤打誤撞，被封「退休專家」及「投資達人」（故有N個騙子利用我名字招搖撞騙），一切又係絕冇刻意規劃，撞出來。
　　
另外，眾所周知小弟為食成性，並有多個「為食小組」，晚晚出外覓食。食吓食吓，又食出個乜乜物物食家身份。其實全部冇乜研究，純搵到好食的，就公諸同好。
　　
退休後，時間多咗，又自由，可以個個星期睇兩三套電影。如此，一年就是百多套。搞搞吓，又變「電影精」，推介的電影，累積不少追隨者，凡我推薦就入場。
　　
基於有專欄，又有社交平台，加埋十幾萬讀者粉絲，慢慢又累積到影響力。
　　
昨晚有位影壇中人認真提議：「碌Sir，你可否搞個『跟住碌Sir去睇戲』的群組呢？話唔定可幫到本地艱苦的電影業㗎！」大家認為有冇得諗？