独家丨李幸倪 林奕匡 廖子妤揭童年过瘾秘史 为Sell配音动画笑谈温馨手足情
李幸倪（Gin）和林奕匡（Phil）第3度为动画《魔法精灵》配音，今集《魔法精灵：夹band天团》还有声演初哥的廖子妤（Fish）加入。电影以兄弟姊妹情做主题，戏如人生，Gin便获家姐来港陪做访问； 而Phil就好记得可以讲一世的哥哥暖心举动；童年Fish就爱憞起家姐款管教两个妹，三人讲起温馨家事就停唔到。采访：杜杜 摄影：Stanley发型:@angus1030@artifylab(Gin)、kenki lau(Phil)、Cedric Tsang(Fish) 化妆:Chi Chi Li(Gin)、carmenC(Phil)、Angel Mok(Fish) 场地:红磡黄埔天地
Gin第3度声演“宝宝公主”，最开心跟角色一齐成长，“唔知仲有冇机会帮佢配音，已觉得好圆满，角色每集都有唔同，今集佢大个女同阿班拍拖，下集可能讲佢结婚生仔。”而第3次为“阿班”配音的Phill就要热身，“记得第1集要录几日，因为唔合格仲要重新录过头𠮶段，第2集已经唔使补录，到今次因为隔咗几年，角色情绪又比较高涨，需要用半个钟热身，我平时比较温柔嘛！哈哈！”
Gin有家姐陪做访问
首加入《魔法》的Fish亦好紧张，因她只帮过自己演出配音，第1次声演动画人物，加上担心带有马来西亚口音，“知道原来我系做Gin家姐，咁就啱嘞！哈哈！我最钟意成个配音过程，最后配啲情绪嘅声，可以随感觉咁嗌，好好玩呀！”声演新角色“花花”的Fish，钟意这个精灵家族好有爱，“佢哋生活好简单，就系剪剪贴贴，钟意啲闪令令嘅嘢，仲有唱歌、跳舞，又冇纷争，好钟意呢个世界观，最重要世界和平。”
电影以手足情为主，3人好有共鸣。Gin戏里戏外都有个家姐，角色令她想起很多童年回忆，“我家姐都系cool cool哋，我哋细个都系钟意一齐剪剪贴贴。”Gin两姊妹年纪相差大，所以关系亦分几个阶段，“细个佢放学返嚟第一时间揾我抱抱，到我上小学佢读中学就有啲尴尬，佢反叛期有自己圈子，到再大啲10几20岁，又close返，一齐买衫、化妆。”虽然近10年她来港发展，但无损姊妹情，每日都会传讯息或者FaceTime。其实Gin姐姐近日来港探望她，还陪她做访问，但因怕丑不愿上镜。
感激家人撑来港追梦
Phil亦跟角色一样，同样有哥哥，不单感情好，哥哥亦是他的榜样，“无论读书、做嘢，我超越唔到佢。”行开温文路线的Phil，原来细个相当百厌，经常整烂哥哥嘅玩具，“哥哥成日笑我，无论玩具定鞋，都容易烂过人，哈哈！”年前他终于补偿哥哥，“有个日本嘅玩具喺美国卖断巿，佢见香港有得买，就问我可唔可以帮佢买，之后我唔肯收佢钱，我话‘系补偿我咁多年整烂你啲嘢’哈哈！”两兄弟细个可能会有争执，但长大后Phil发觉哥哥好锡佢，“佢由埠仔搬到温哥华读大学，知道我好钟意某个歌手，买CD送畀我做圣诞礼物，𠮶时啱啱可以将CD放入电脑、MP3，但佢都冇拆只CD听住先，佢话知道拆CD𠮶个动作好喜悦，所以留返畀我，呢个可以记一世。”
Fish跟角色都是家姐，细个会跟角色一样爱憞起家姐款，“想保护两个妹，扮到好强势，话呢条路唔行得，一定会撞板，就管多咗，譬如佢哋着衫同埋言行，其实自己都做得唔好。”Fish称现在跟两个妹如朋友相处，“唔系一齐住，比较少见，会好珍惜相处时间，同埋佢哋都结咗婚，好似得返我系细路女咁。”
3人都是离乡别井来港追梦，强调家人的支持很重要。Gin说：“如果当初佢哋反对，都未必可以行到落去。”Phil好认同，“哥哥读到博士，跟住去做科学家，一切都好稳定，我先可以任性，如果我系阿哥一定做唔到，所以我好幸运。”Fish亦好同意，“唔系一定要拉晒大队，我屋企就系默默地支持，自己好蠢，𠵱家先意识到最强后盾，无条件嘅爱，无论我做得好唔好，佢哋都会喺度，𠮶种感觉令我好安心。”
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
