【曾智華專欄】畀貼士者的矛盾

周三晚第六場跑完，手機立即跳出信息，來自老友「抵死B」：「碌Sir，犀利喎，貼隻三十八倍馬『龍的風采』，唔太差吖，跑第八，輸五個馬位啫，哈哈哈，好準㗎喇！」
　　
點回應呢丁死仔？難道辯駁咁戇居？只好回以一個無奈的Emoji。
　　
每逢賽馬日，本報馬經版幾十個專欄，個個作者都提供貼士，有幾多會命中？你自己Check吓就知，佢哋個個都想中，但結果呢？
　　
畀貼士乃一個極大矛盾，畀熱門馬，「抵死B」呢類多口佬一定揶揄：「唓，擦鞋仔貼士，使鬼你畀咩？叫乜做馬評人啊？收檔啦！」
　　
邊個唔想提供冷門而爆出？但十次都冇一次會中，「盲公陳」都唔掂啦，博被拆招牌咩？所以，畀貼士與睇貼士，千祈咪認真，賽馬只是一場遊戲一場夢，以為自己好勁者死！
　　
例如上周日在沙田威爆玻璃的兩位騎師潘頓及艾道拿，相隔幾日立即由馬場龍變馬場蟲。
　　
潘頓重新攞返條「軟鞭」出嚟，全晚遊馬河，競賽小組有冇抽秤？冇！吹佢唔脹，掹佢唔長，全晚一隻位置都冇，咬佢乎？
　　
另一位艾道拿，也開始進入「香港賽事角色」，上周日做咗「騎師王」之後，立即縮，一隻W、一條Q都冇，難度好高㗎老友，但香港賽馬就是如此！
　　
明天最令人興奮，為全球頂尖高手麥道朗空降，任何真正馬迷，必仍在回味佢如何在千分一秒之下贏出「浪漫勇士」，真真拍爛手掌。
　　
今次短期客串，一眾練馬師為打好關係，紛紛提供有機會馬佢殺，尤其沈、東、蔡及姚四廄，要𥄫實。
　　
我投注以下四隻，沈廄的「旺旺神駒」、東廄的「同樣美麗」、姚廄的「魅影獵飛」及蔡廄的「氣勢」，全部熱門，但重點不在贏錢，而在睇表演，四十蚊買！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。