【曾智華專欄】極度可疑推介片

資本主義世界，有錢就有賊，越多錢則越多騙子，有啲合法，有啲非法！
　　
合法的，不少在金融機構，包裝成「金融才俊」，身光頸靚，好鬼掂咁款，多數醒目靚仔靚女，口馬玲瓏，聲稱有投資好推介（若掂，唔該佢自己瞓身買先，為乜要搞到成身汗𠱁人落疊？），其實目的只有一個：賺客錢而非替客人賺錢（若撞正就大家好彩）。
　　
近日又發覺YouTube上大量推介呢樣嗰樣的「誤導片」，話某某產品又平又正，甚至免費！總之最緊要你貪，咁就掂，十條有一條變水魚已有排劏。相信公司包拍，製造「市場反應」，誤導消費者。其中之一，為「推介食肆」，搵大班臨記，化身成不同食客，紛紛幫襯同一間餐館，然後大讚特讚。
　　
本來我唔多覺嘅，但兩月前突然湧出幾條「食評推介」，講及的同一餐館，就在附近。
　　
五年前朋友要求齊齊去食：「睇睇能否畀多少意見。」此店出品平庸，只好勉強指出幾處應該改善之處，之後當然冇再去。
　　
年來晨運經過，見佢做吓差啲，做吓又差啲，望入去，衛生情況麻麻，更冇意欲幫襯。
　　
去年此店突在附近街角擺出多個易拉架，上寫：「小菜四十八，好過自己煮！」四十八？會有乜貨色？平通街仍沒有甚麼起色。然後聽見「東主出讓」，疫情期，搵鬼接手？
　　
疫情過後，就在最近，突然在YouTube見幾條片彈出，多位「街坊」推介此處的多款小菜又平又美味。小弟傳媒出身，當然冇咁易乜都信，更何況班「演員」欠專業水準，表情假假哋？
　　
終於前日晨運經過，但見鎖上鐵閘，黑漆 一片，門口掛上「內部裝修」。裝修？為乜咁多條「推介片」湧出，仍搞到要「內部裝修」？你應該明白嘅！