【曾智華專欄】矛盾的台灣

過去十年，除了疫情兩年外，不停到過台灣二十多次，算是對此地有點觀察。
　　
一方面覺得寶島人民質素相當高，有幾點可見證。第一，在公共地方基本守禮，尤其服務行業，多數服務員會令你感到做客人的受尊重與舒服（對比香港）；第二，市面相當整潔，雖沒垃圾桶，但不會見到隨地拋垃圾現象（這也是遠勝香港）；第三，共享單車處處可見，並沒人毁壞、亂放（香港早年大把，甚至掉落城門河），人人用完，安放好才離開。
　　
以上只是三個隨處可見的例子，所以，作為香港人，未免覺得自己的公民質素低了大截。
　　
不過回到酒店房，打開電視，又恍似進入另一個世界。因目睹的全是嘈到拆天的時事評論員，個個擘大喉嚨搶講，將台灣的政治人物踩到一文不值，恍似冇個是忠的，也冇一個真正為台灣大利益而獻身。
　　
批評政黨，國民黨當然迂腐無能，個個阿斗，冇一個代表性人物足以單拖迎戰民進黨賴清德，故搞到要「苟合」（佢哋形容）本來貌不合而神離的民眾黨，擺明借膊頭增加政治能量。
　　
係真唔係真？當然真。但一眾時事評論員，日日瘋狂抹黑侯友宜及柯文哲，全皆自私奸人，而前總統馬英九也是「身在台灣心在北京」，這幫人絕非一條心。故若勝出，勢必立即開始內鬥。真唔真？可能真！但呢班巴喳評論員，不停只懂踢爆台灣政客的不堪而欠高層次識見，真真低莊惡頂。
　　
相比之下，攻擊民進黨冇乜吸引，政治名嘴多冇興趣踩。
　　
粗淺觀察，如今台灣由政黨到政治評論員，皆亂作一團，似足一班「鬥大聲」在演馬戲。如此水平，點打「世界波」？