【曾智華專欄】鄉下仔騎師多無知

今年5月騎師波健士及蘇兆輝出事，前者因投注賽事，違反誠信被釘牌十二個月，後者也違反同一規例，被取消出賽資格十個月。兩者所犯的非常嚴重，能再回港策騎機會不高了。
　　
事件發生後，有極資深退休馬會高層對我講：「碌Sir，好多外國騎師其實是單純鄉下仔，年紀又輕，又不知世途險惡，尤其對香港馬會保安部的神通廣大更成嚿雲咁，點會唔中招？」
　　
睇返班德禮個案，真真感到佢儍吓儍吓，畀人𠱁咗入局都完全不知其嚴重性。
　　
罪名第一條，擺明有人利用佢攞料，連「獨家用」手提電話都提供埋，有少少分析能力的都應知，即要避免畀人偷聽，故鬼鬼祟祟另作安排啦。
　　
第二項更攞大命，竟同意接受一名人士的款項，而該名人士並非其曾策騎出賽馬的提名人。即係點？即係「收外人水」！
　　
騎師「收水」後，當然要執行「畀水」者的指示，難道有人無緣無故胡亂派錢畀你咩？
　　
究竟畀水者要求班德禮做乜，馬會一定知，不過，證據可能留返日後用。幸而今次班德禮並冇真正收下指控中的金錢，否則監都有得坐！
　　
呢個Case，若我冇估錯，肯定仍會發展，因邊個安排及提供電話，以及邊個提供款項畀班德禮，馬會應全盤掌握，日後會否「做嘢」，圍內人尤其傳媒，當然極度關注。
　　
好嘞，馬季進入大賽期嘞，明日先嚟三場二級賽，跑平磅。至此高分實力馬將全部歸位，難再爆大冷，最多只能熱頭冷腳。
　　
千二米及一哩賽想收錢？易！分別用「金鑽貴人」及「加州星球」做二重彩複式膽全餐啦。起碼衝線時有得嗌——上上上！不過，派幾多就唔知喇！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。