【曾智華專欄】一個人「霸」一行

年紀越大，越喜歡與人潮逆向而行。尤其長周末及大假，一百數十萬港人湧往韓日台泰及深圳時，我一定留港，享受平時難以一見的寧靜，尤其駕車路路暢通，很有「快感」，去到邊都唔塞車，你話幾正？
　　
另外，受歡迎的食肆一律有位，呢種事事便利的閒逸生活，極難得。
　　
好嘞，當個個湧返港，搞到人多車塞時，我就玩倒轉，有機會把握周一至周五行開幾日！
　　
剛剛上周走咗一轉高雄。搭上午十點半中華航空，拖住老婆大人，悠悠閒先在機場食個Cheap Cheap哋又渣渣哋早餐（無謂講邊間啦），然後，施施然行去十號閘口（嘩！第一個閘，乜咁筍？）登機。
　　
成架機得兩成人，真真罕有，可以一人坐一行，三個位，舒服到呢……
　　
機艙整潔，服務員有禮，毛氈封膠袋，夠衛生，唔怕有床蝨。
　　
準時起飛，一飛就派早餐，水準也屬平庸，但難有要求，食兩啖就放棄。
　　
一轉身，空姐已火速將早餐盤回收，話咁快將降落，忍不住叫聲——好！小弟近年有「空中監倉」」恐懼症，凡超過五小時航程，必有極度不安感覺，尤其當航班爆滿，要與三九唔識七者擠在小小經濟艙空間時，立即有窒息之感，故近年戒絕長途機。
　　
老婆大人精打細算，選擇入住中央公園旁的英迪格酒店（Hotel Indigo），位置就在捷運站頂，來回機場完全不用搭的士，可慳二千元台幣的士費，且更方便、更快捷。
　　
「碌老公，你朝朝要做晨運拉筋，對面個中央公園又大又靚，啱晒你！」
　　
放低行李後，按接待處提議，步行十分鐘到一間古雅的小餐館，名「永心鳳茶」，一邊欣賞古典音樂，一邊歎老母雞熬煮的鮮蝦湯麵，舒服到有點唔似真實！