【曾智華專欄】今日捧「名校馬」

布文真是黑仔，呢頭坐完馬監復出，嗰頭就墮馬，肩胛骨裂，應該冇機會出戰《香港國際賽事》嘞，損失相當慘重，幸而傷勢則不算嚴重。
　　
不過，人生就是如此，禍福經常橫飛而至，冇得預計，唯有煮到埋嚟就食！
　　
上周六跑完樂聲盃，上周日到日本女皇伊利沙伯二世盃。當日跑七場，搞鬼笑，我中三場二重彩，派彩加加埋埋竟只得三百三十元，正奀豬。
　　
尾場最離譜，出十六隻馬，二重彩派七十二蚊，過終點時我仲嗌到拆天，以為發達，點知⋯⋯當晚只好食其兩餸飯！
　　
今晚又有得玩，跑九場。似乎夜賽加到九場已成慣例，究竟是否投注額下降，逼住用呢個方法谷呢？但又是否有效呢？
　　
好！精心研究第四班1650米，揀隻「名校馬」，皇仁飛駒團體旗下的「皇仁福星」。
　　
近兩年名校馬真係好掂，例如由小弟母校聖若瑟書院大群舊生組成的堅又威團體（Green And White乃校徽顏色），自購新馬「堅又威」，姚本輝訓練，上季初亮相，已大受關注，竟無情情未跑過而一出得四倍，熱到癲，都唔知飛從何來，結果跑第九。不過，跟住再出，已入Q。然後第四次上陣Easy Win，顯露高質。今季再出兩次，已一W一Q，總獎金已近一百九十萬元。四歲，將有數W在手。
　　
另一匹名校馬「保羅傳承」更勁，屬聖保羅校友團體，經已七歲，踏入第五季，但仍可出戰，簡直鐵馬！至今出賽超過四十次，贏到你唔敢信，剛剛跑沙地又勝出，總獎金近一千二百萬元！
　　
今晚我捧的「皇仁福星」，由當紅炸子雞伍鵬志訓練，上季初出儍吓儍吓得個桔。但今季脫胎換骨，出四次已殺兩Q兩P，全在1650米。今晚執四檔，細W大P「藕」落去啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。