【曾智華專欄】大劉與古仔

上周六早上七點到茶記打躉，揭開本報新聞版，冇乜吸引，改睇娛樂版，勁搶眼！「大劉」劉鑾雄開記者招待會，大罵某某「賤人」。我心諗：「使唔使去到咁盡呀？」
　　
大家心照，心智正常者，絕對唔會隨便恨一個人，若恨之入骨，之前一定有過非常⋯⋯的經歷。所以，大劉咬牙切齒鬧的人，茶記內八卦友個個話呼之欲出啦。
　　
早餐完，跟住睇長者早場，選咗《白日之下》。呢套片籌備足足五年，點解？因劇本冇乜商業元素，投資者難搵也。終於又係有勞「古仔」古天樂拔刀相助，才能開拍。
　　
影圈之內，古仔已成大俠，冇人唔服，因佢低調地（甚至冇公開）幫過N部有意義電影順利誕生，只因想為社會做點事。好人好報，故能夠豬籠入水。
　　
《白日之下》，原來有另一筆資金義助，乃「劉鑾雄慈善基金」，開場時大大隻字打出來，小弟不禁會心微笑。因兩個鐘頭前才見佢狠狠出招踩「賤人」，如今又磅水拍良心社會片，比對相當戲劇性。
　　
《白》片講乜，個個知。事實，2015年的護老院虐待新聞轟動全城，人人大叫：「嘩⋯⋯咁都得？」
　　
真係「得」㗎！我知，因當年家母要入住護老院，我只好不停尋覓，曾參觀過不少，在草根區內的，真有很多似片中的不堪入目。
　　
你話嘞，社會福利署會否儍吓儍吓，唔知日日有「慘情」發生？白癡的才會信！不過，片中也有道出原因。現實中，邊個有能力用一日、一月，甚至一年，就能將慘況全部改變？冇！一如劏房、籠屋的存在，全部事出有因。
　　
當然，這絕非「唔做嘢」的藉口！冇人會要求政府識變魔術，即時有足夠合標準的老人院宿位，但理應有個KPI，有個目標去奮鬥啩？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。