【曾智華專欄】的士大哥心聲

老友S經常坐的士，一上車就與的士大哥閒談，因佢認為的士司機日日長時間在路上，乜嘢都見到，加上又乜人都可能坐的士，故此城市八卦及秘聞特多。

不過，一如「正常」乘客，遇上的士司機，十之六七毫無禮貌，個別更成身火，係人都鬧。

呢種情況人人皆知，人人都受過。當然最火滾是遇上冚旗揀客，又或上咗車，知你坐短途就趕你落車。唔落？好，全程又快又窒又急煞，再大力掟彎發脾氣。

究竟有幾多的士司機會視乘客為「客人」，而有「待客之心、之禮」的呢？你話啦。

講到做客，S哥前晚有奇遇：「碌Sir，呢個有趣，你寫出嚟令讀者開心吓啦！」

原來佢遇上一個健談司機，沿途猛呻：「老友，香港死得㗎喇，邊有人留低消費吖？

港元強，乜都貴，你有錢都去紙水低、樣樣平嘅日韓台泰啦。當然，最就手返內地！」

「咁你是否經常到內地消費呀？」S問。

「當然喇，一星期起碼三、四晚！嗱，午夜收工，成班同行將車泊邊境附近停車場或爛地，咁夜好少食牛肉乾，然後過關去深圳。搵間場揼骨，通常都提供任食自助餐，食飽飽，揼得舒舒服服，在按摩房瞓到天光，四、五百人仔乜都掂，天光再返香港攞車開工！」

「咁都幾煩喎。出出入入，又唔係屋企，仲有冇其他吸引呢？」S哥又問。

「當然有啦。喺香港，無論到骨場或酒樓食肆，不少服務員都似食咗火藥，又經常窒客，又毫無禮貌。呢呢，返深圳就唔同嘞，我去到邊都真真正正有做客人的優越感，處處誠意接待，感覺零舍唔同！」

S會心微笑，乜的士司機都會知「客人」要求乜嘅咩？咁點解班大哥回港一開工，即忘記乜叫「客人」？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。