【曾智華專欄】「小刺蛋」踩氹唔算數

日前本欄賽馬貼士只畀一隻，就瓜一隻，正是「小刺蛋」，但有睇直播皆知今次純輸意外，賽績可以抹去。因為馬匹跑咗二、三百米後，突然踩氹向前跪，呢下拗一拗，當然唔使再跑。

賽馬結果有真有假，也會有意外，所以，記住記住記住，投注千祈唔好「瞓身」咁豬頭。

另外，小弟提到的「德國班霸拜仁表演輸」，也觸動不少球迷（當然是落注一類）及資深球圈人士神經，紛紛在社交平台上回應。

最啜核為某一極資深球壇名人，留下一句：「唔輸波，點出糧？」

其實人人皆知，任何大小球賽，一涉及賭博，「有需要」時就會「造波」。

呢類「造波」，若非離晒大譜或內藏天大醜聞，多數冇乜監管機構出聲，隻眼開，隻眼閉。

事實有睇過Netflix紀錄片者，都會知國際足協及歐洲足協根本是個「老鼠竇」，基本無王管，那班掌權大鱷唔上下其手就奇！

上者如此，去到球場上的球員，你想佢以「體育精神」出發，場場打真軍？你係咪儍咗？

不過，萬事總有條底線，若離譜到好似早前的中國足協及中超聯咁，就真係必須「繩之於法」。

小弟也曾指出，一到歐聯呢類唔衰得賽事，每隊必立即回復「正常」，賽果自然合理。

果然，周中歐聯全部強隊「回魂」勝出，冇爆冷。所以，若投注，買歐聯最易中、最易買餐餸！在未確定出線前，超級班霸點會放軟手腳？未死過乎？黐線乎？

今日跑沙田，又有高班讓磅賽「樂聲盃」，千四米，蔡神仙及告仔各出一對，冠軍由佢兩個定！我二重彩會用「綫路之星」及「紅運帝王」行頭，指定一、二位，再拖「美好世界」及「增有」做腳。

潘頓騎「大哥大」告仔馬，極少有古靈精怪，想死乎？