【曾智華專欄】梁儉玲「快活」服務態度

今日標題可能令絕大部分讀者摸不着頭腦，因彈出了一個「梁儉玲」的名字。

其實梁儉玲只是人海中一位普通的女性，咁有乜值得特別一提呢？

背景是這樣的。

小弟終日在外覓食，由街邊小攤檔到快餐連鎖店，再到米芝蓮星級食肆，不停幫襯，故此，對香港整體的飲食出品質素及員工服務態度，有第一手掌握。

二十一年前，劉德華有條政府宣傳片，大大聲講：「今時今日咁嘅服務態度，唔得㗎啦！」此片2002年攝製，主要為推動「優質服務致勝之道」。呢條片深入民心，人人每日睇N次，究竟當年有冇效？留待大家評論。

但小弟肯定，二十一年後的今天，整體食肆從業員的服務態度，比當年更差劣！

親身見證，有員工互罵粗口，不止，打交亦見過，搞到要報警（大型酒樓集團），而一邊做，一邊在客人面前粗口橫飛的也不少。

另有一種，邊做邊罵上司、罵老闆、罵公司，不停散發負能量。

原因？簡單，全香港行行唔夠人！人性的劣質一面就是如此，當打工仔東家唔打，可以即時打南西北家時，大都不會珍惜工作，慢慢不再專業。上司又因員工難搵，被逼縱容啞忍而不敢苛責，令管理水平變無底線式下瀉。

就如此，當大家對現今食肆員工都再無要求時，若突然彈出個彬彬有禮、為客着想的服務員，怎不令人眼前一亮？

這位正是何文田廣場大快活的收銀員梁儉玲，不但次次笑着打招呼：「請問今日食乜？」然後又會為客人設想：「你合併叫二人餐會慳幾蚊㗎，內容完全一樣！」

佢見到我呢位儍下儍下「屋邨阿叔」，一樣循循善誘，絕對難得！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。