【曾智華專欄】德國班霸表演輸波

體育一介入賭博，自然假假哋，但又不是次次假，咁幾時真、幾時假？
　　
唔輸得的場合，又或獎金及名譽高到飛起的，當然真。嚟真，名利兼收，遠遠超出造假所得到的！
　　
例如賽馬的打吡大賽，邊個會豬頭到明明贏得，走去輸咁戇居？
　　
又例如足球，歐聯最後八強，邊個球員夠膽打假波？冇！因班主們正在爭奪天文數字的收益，當然場場金睛火眼！
　　
但正如小弟多次指出，賽馬方面，真正馬王多數不會在讓磅賽中亂博，浪費體能也；要博，就選平磅賽，着數晒才郁手。
　　
於是凡讓磅賽，馬王出賽，多數「輸馬贏錢」，屢試不爽，大家早應心領神會。
　　
足球又如何？同一道理，歐洲班霸例如曼城、巴黎聖日耳門、拜仁、些路迪等本土聯賽的超班雄獅，點會有興趣浪費氣力及時間贏盃仔？有力的話，重視程度當然由歐聯開始，再到超級聯賽，然後數落到歐協聯、足總盃⋯⋯本土盃仔，套用廣東俗語——贏嚟把鬼咩！
　　
既然要輸，當然目標是「輸波贏錢」，當畀幕後出花紅。故此，小弟最大興趣估歐洲班霸選邊場爆個石破天驚，次次十蚊下注考眼光。
　　
哈哈哈，上周三發達！打開足智彩賠率，德國盃拜仁作客對丙組仔沙貝魯根，一隻是雄獅，一隻小綿羊，本來冇可能有得揮。於是沙貝魯根勝竟有四十倍賠率！
　　
我當然用十蚊雞「藕」落去啦，結果，開呀，拜仁果然/竟然輸波，問你服未？
　　
有冇監管機構出過聲呢？冇！可能又「皆大歡喜」未定嘞。
　　
今晚跑馬地賽事，新丁練馬師巫偉傑出三隻，全商借師傅告東尼牌仔鍾易禮騎。「小刺蛋」雖排外檔，冇有怕，因上季W出也是十一檔。捧大P小W！