【曾智華專欄】老婆要求我退休

老友聚頭歎美食，本應是開開心心的，但全晚「專業文」無晒心機，肯定有事。
　　
「阿文，係咪身體出問題？點解悶悶不樂？」
　　
文哥今年六十九歲，日捱夜捱，早早個樣殘到似七十五歲，出事絕不奇！
　　
「唔係呀碌Sir，而係⋯⋯唉！上周同老婆睇電視新聞，剛剛播李克強突然游游吓水死咗。李克強只退休幾個月，比我細一歲，咁樣話去就去，更加強老婆大人的⋯⋯」佢欲言又止。
　　
究竟係乜？「專業文」其實乃富家子弟，老竇早早剩下大把，但佢乃工作狂，開咗檔生意自己一手一腳做，相當有滿足感。正因有滿足感，故日做夜做也不覺累，不過，當然間中冷落嬌妻，畀另一半哦到飛起。
　　
「老婆大人指示，我出年一定要退休，將檔生意或賣盤或結業，然後陪佢好好環遊世界一次，以免我隨時變李克強，咁就終生抱撼喎。」
　　
從文哥的表情及語氣，唉，大家認識咁多年，當然知道佢老不願意退休啦，但又覺老婆大人有道理，唔知點回應，於是近日只好晚晚搵老友飲悶酒。咁搞，健康肯定受影響。
　　
小弟認識的「老」男人，不少也有同類問題，正是另一半逼自己做這樣那樣唔想做的事，包括戒煙、戒酒、戒食乜食物，當然，也要求戒賭馬賭波⋯⋯其中一樣，爭議最大，為要求移民。
　　
「大佬呀，都咁老嘞，所有童年好友皆在香港，你叫我走去人哋個國家做外國人為乜？人哋政府關我乜事？冰天雪地生活有乜好過⋯⋯」
　　
以上說話，大家只敢同老友講。
　　
回說「專業文」，臨走有點醉也有點悲：「碌Sir，你最明白我。日日做開喜歡有意義的事唔做，走去游手好閒，第二個唔知，我則肯定快死過李克強！」