岑珈其自爆囝囝失控「典地」似鬼上身 學懂紓壓避免將負面情緒帶給兒子
人稱「爺爺」影壇新貴岑珈其日前參與保險公司舉辦的《籽望未來》(Seeds for Future) 計劃啟動禮，更與小一學生大玩「情緒維他命」卡牌遊戲，教導他們表達情緒。岑珈其自爆兩歲半兒子臻臻正值trouble two時期，試過一次扭計扭到岑珈其都忍唔住笑囝囝似「鬼上身」！
【相關閱讀】：獨家丨岑珈其期待同囝囝去張保仔洞探險 聲演《奇異大世界》圓三代同堂歷險夢
【點擊睇岑珈其與小一學生玩卡牌遊戲】：
活動上當日，岑珈其與義工帶領一眾小學生進行情緒卡互動遊戲，跟學生打成一遍，儼如大細路般。他自言在家庭的角色除了是丈夫和爸爸，也是臻臻的「玩伴」，無論多忙總會抽空跟囝囝出街、踩單車，甚會親自接送囝囝返學。岑珈其不諱言兩歲半的臻臻最近開始展現不同情緒，他說：「囝囝啱啱接觸YouTube時，好瘋狂咁睇，一唔畀佢睇，佢就發脾氣，喺屋企又會發、喺街又會發，之後我學冷靜，原來只需要set一個時間，例如10秒，10秒已經可以令佢好開心，因為已經做到佢要做嘅嘢；又試過有次佢扭計唔肯沖涼，然後失控大喊，大叫同『典地』，我問太太佢係咪鬼上身，最後我同太太唯有行開，佢『典』足5分鐘，等佢自己冷靜。」珈其指兒子正處於trouble two的階段，情緒十分波動，但透過玩卡牌遊戲，令他掌握到如何運用情緒卡教導孩子認識、表達自己的情緒及想法。
岑珈其學懂紓壓避免負面情緒影響囝囝
自從成為爸爸後，岑珈其學懂怎樣紓壓，免得將負面情緒帶到小朋友之上，他說：「做爸爸前，自己情緒起伏好大，情緒唔係控制得好好，一路工作、一路成長就變得稍為好啲；但成為爸爸後，呢方面就急速成長，會不斷控制自己情緒，想喺囝囝面前做好榜樣。」經常忙於拍戲拍劇拍綜藝，往往要靠太太幫忙疏導兒子情緒，岑珈其揚言要更錫老婆，給對方更大的體諒。望子成龍可說是為人父母的終極目標，但對於岑珈其來說，臻臻能夠身心健康成長才是最重要：「呢個問題，自己每日都諗，覺得佢保持身心靈健康係最重要，自己喺過來人，細個唔係讀咩好叻嘅學校，但就好開心、好自由，鍾意玩咩就玩咩、學咩就學咩。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
