【曾智華專欄】戰線太多，頭痛欲裂

行走江湖多年，乜嘢人種都見過吓，男的基於有英雄感，愛認叻，多數瞓身，甚至不擇手段賺錢及爭權。
　　
奇在不少人竟以此為人生僅有的志向，於是過程中犧牲大量應該珍惜的人事物，直至在老人院插滿喉時，才知自己幾戇居！
　　
這個，你若認識專替臨終人圓願的「基督為本基金」義工，自會發現差不多所有畢生爭權奪利之輩，在最後人生路上，皆會後悔到淚流滿面。
　　
但話說回來，行緊時當然唔係咁諗，否則點會有兩個美國老伯拜登及特朗普，仍在打生打死，想霸住個「煩到抽筋」的總統大位？
　
講起拜登，睇睇佢面對的問題，真係人都癲！單單國內已N咁多龐大拉後腿勢力。
　　
尤其剛選出的眾議院新議長約翰遜（Mike Johnson），乃特朗普「隻馬」，你想佢同民主黨合作？有冇咁天真？
　　
如此，拜登肯定開始諸事不順，尤其對烏克蘭的撥款，將會鋪鋪被掹腳。
　　
特朗普乃心戰專家，明知美國不少民眾對俄烏之戰已有點厭倦，開始不想「無底線」燒錢支援，但拜登又洗濕咗個頭，咁仲唔玩盡美國人情緒？
　　
另一杰撻撻為中東國家對以色列狂炸加沙，造成數千婦女及兒童死亡，新仇舊恨湧上心頭，令大戰如箭在弦。中東這個火藥庫，美國插手又唔係，縮又唔得，頭都大！
　　
世局千變萬化，冇人知哈馬斯會咁樣郁手，如今一郁，搞出N咁多變數，掀動全球神經。
　　
成盤局，暫時令中國可以鬆一鬆，因美國顧住搞俄烏及搞以巴，已再無力似早兩年咁搞中國，反之，無數事項要坐低傾，因太多「你中有我、我中有你」的藤瓜糾纏關係
　　
香港人乜都做唔到，只做到一樣——睇！