【曾智華專欄】假如潘頓消失了

越來越相信，若香港馬圈冇咗「軟硬鞭」潘頓，將有一番新景象，可能投注額會回升！這是一個推斷，發生後才可印證。點解咁諗？因身邊的馬迷日怨夜怨，怨「潘頓現象」，唔知佢想點，搞到投注賽馬熱情大減。
　　
好馬畀佢霸晒，但又唔知佢出「軟鞭」定「硬鞭」。「軟鞭」一出，輸死普羅馬迷；「硬鞭」？通常勝出都冇肉食，毫無滿足感可言。
　　
小弟又點睇？簡單，任何一個表演或競賽圈子，必須生生不息才會有吸引力。
　　
雷誠、馬佳善、韋達及莫雷拉初來時，就製造出一種投注的興奮感。不過，任何「贏馬機器」多見亦常人外，總覺得日漸變古靈精怪，當馬迷白癡。當然永遠有人好似好化咁話：「賽馬就是如此！」
　　
咁講即是周街打劫強姦，然後你就話「正常社會」就是如此。咁係咪當執法者死嘅？
　　
潘頓日漸令人厭倦乃事實，若佢能夠行開吓，對佢自己及對香港馬圈皆是好事。
　　
一如足球圈，若年年都是美斯及C朗攞金球獎，咁個頒獎禮必定收視率越來越低。幸而美斯都知攞埋呢屆就應「夠皮下台」，輪到麥巴比及夏蘭特等天才球員上位。
　　
香港馬圈冇咗潘頓，大量好馬有機會畀其他騎師策騎。騎士如武士，冇好劍在手，會飛都冇用！一有好劍，布文及田泰安當然起飛。另外，仍未見底的鍾易禮、霍宏聲、董明朗、艾道拿、艾兆禮也會升呢！
　　
周三提供兩隻，「木火同明」六倍勝出，執返身彩。
　　
明日沙田美女如雲，為支持美麗系，一於隻隻十蚊W！婦女銀袋三級賽，讓磅。選三匹：「直線力山」同程兩出兩勝；「健康快駒」董明朗試閘冇得騎，潘頓霸住；「當年情」上仗千八米輸少少，矛頭今仗！