【曾智華專欄】政府走「香港威威」大雞

任何機構、城市、國家，都要提升士氣，香港更百分百需要！所以，理應乜嘢大小威威都來個大鑼大鼓！亞運攞銅牌，局長恭喜；攞銀牌，司長恭喜；攞金牌，當然特首超哥開記者會恭喜！一於搞到特區好似日日有喜事，平衡一下負面新聞，尤其樓價跌、股市跌、出生率又跌⋯⋯
　　
正因如此，實在無法明白，點解香港馬締造歷史紀錄，「浪漫勇士」奪得世界頂級賽事「覺士盾」冠軍，上周六、周日政府竟好似啞咗，聲都唔聲，一句恭喜都竟然冇！
　　
普通市民可能不明白，但馬會以至負責旅遊體育的楊潤雄局長，理應深知這次並非贏場馬咁簡單，而是香港賽馬運動，已能練出最犀利的國際頂級馬王！
　　
非馬迷在這方面「坐井觀天」不奇，建議上網了解一下覺士盾在賽馬世界幾重要。而攞到冠軍，是幾無上的光榮。
　　
想知幾深奧，易！翻睇賽事，欣賞一下澳洲騎師麥道朗如何在萬分之一秒鐘揮低對手！
　　
這個冠軍重要性，在「運動界」，遠比亞運、奧運金牌來得更珍貴。
　　
如今馬會有兩位大員譚志源及梁卓偉為前政府高層，趁熱度未過，請超哥搞返個大型慶祝會啦。
　　
其實香港已經冇乜可以拍心口話——全世界我最威！如今捉到一瓣，豈可不瞓身大鑼大鼓宣傳，讓香港市民提升少少士氣？
　　
今晚快活谷，選擇唔睇「軟硬邊」潘頓，因佢神出鬼沒，贏出都冇味，嘥氣。
　　
咁不如繼續買「田雞開飯」！田泰安必趁布文停賽盡贏。今晚「夫卜」，有幾隻可入位，最大機會W出為「英雄豪邁」及「木火同明」。後者為何良寶藏，今季散倉，鄭俊偉接手，已兩出一Q一P，離W不遠矣！