【曾智華專欄】靚到唔捨得食

有幾間小弟心愛的食肆，凡一訂到位，我就會每三至四個月拜訪一次。點解？因全部有獨家招牌出品！
　　
舉例，中環「陸羽茶室」的蓮子八寶鴨及杏汁豬肺湯、寶勒巷「瑪寶鮮」的砂鍋龍躉尾及古法羊腩煲、「順德公酒家」的紫薑欖角清蒸生劏花錦鱔、灣仔「船記」的籠仔三鮮蒸飯、六國飯店內「粵軒」的黯然銷魂叉燒飯、旺角「小皇府」的黃沙膶及第粥、北角「富嘉閣」的鮑魚燴魚唇⋯⋯
　　
另有一間，昨晚拜訪，水準依然高！邊間？正是灣仔喜萬年酒樓。點解強調佢水準依然高？因為過去半世紀揸Fit的老臣子董事陳海祥，年初決定退休，佢一向是此酒樓的「定海神針」，將軍一去，熟客們少不免有點擔心。
　　
上位的是祥哥長期的副手「肥經理」梁國鴻。效果如何呢？
　　
食完，放晒心，因一切「風采依然」！
　　
老饕個個知喜萬年隻燒乳豬好掂。不過，並非十次十次同一水準。點解？因一手豬由越南來時，質素總有多少參差也。
　　
幸而有幾味出品，小弟次次食，次次滿意，今次絕不例外。第一味是此店廚師自己研發的「天婦羅星斑片」，用天婦羅做法，炸啖啖肉的新鮮斑片，效果正到飛起，近兩年已成招牌！
　　
第二是用荷蘭大肥母豬輸卵管炮製的彈牙爽脆「肥生腸」，全港如今變獨家，因來貨罕有，必須預訂，否則分分鐘食檸檬。
　　
第三是靚到唔捨得食的「芋蓉帶子」。芋蓉乃廣東菜中的極品，不少茶樓以芋角作點心，廚師高低手易分。高手的，外殼金黃幼如一絲絲，輕輕咬開，芋蓉軟又香，殺死味蕾，再加鮮帶子，是美食中的藝術品。
　　
點解靚到唔捨得食？上我社交網站「Luke Sir曾智華」欣賞啦！