【曾智華專欄】「民歌鐵人」區瑞強

必須承認，小弟並不是個謙虛的人，尤其早年在咪前，更屬「寸寸貢」一類，懶叻，得罪人唔使本。理所當然，搞到自己周身插滿箭。冇壞，食咗鹹魚當然渴！
　　
我不謙虛，不等於不懂欣賞別人，尤其同行。商台的當然有，自己香港電台更多，尤其對幾位「廣播鐵人」的馬拉松式韌力，無法不寫個服字！
　　
第一位是全球最長直播時數DJ Uncle Ray。由童年開始聽佢，到我退休後八年，佢才離開直播室，犀利到無法形容。
　　
第二位是播音皇帝鍾偉明。又係由孩童時候，日日追佢講武俠小說，到成為同事，見證「大哥」退休後仍日日準時返工（合約員工），直至某日在返工途中離世，將一生獻晒畀廣播工作。
　　
第三位是車淑梅。淑梅姐本來滿口鄉音，在港台做小工（即打雜），之後憑毅力捱出頭，成為二台當家花旦，再晉身殿堂級廣播人，至今仍充滿熱誠、幹勁及決志精神，好驚人！
　　
第四位是區瑞強。佢外貌年輕，幾十年如一，身形更Fit爆，羨慕死人。但今時今日，任何公眾人物真實年紀冇秘密，因一上網即知！Albert於1955年7月31日出生，能Keep到如此外形，是否神奇？
　　
我服晒，因由1973年在九龍塘餐廳開始聽佢自力更生，為搵食唱呀唱，到1977年大家在港台做同事，睇住Albert紅到爆，日日大批歌迷聽迷在電台門口如癡如醉死等，就為見佢一面。好嘞，1973年至今，幾多年？五十年！佢仍天天在電台介紹靚歌，又播又自己唱，更年年開演唱會！
　　
11月又在新伊館登場，今次打正旗號「五十年經典演唱會」，即點即唱，善事行頭，老友點可以唔撲飛呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。