【曾智華專欄】喜見新勢力湧現

任何一個圈子，要進步就要生生不息，必須不斷有新人新事新力量湧現，馬圈當然不例外。
　　
每年馬會皆引入新騎師，有的好，有的差，馬迷眼睛雪亮，一睇就知邊件入錯貨。
　　
例如今季仍是三零部隊的嘉里，跑二十五場，零雞蛋，冠亞季殿皆一片空白，都唔知佢仍留喺香港為乜？當然，也少有練馬師會畀佢浪費子彈。
　　
幸而今季三條過江龍冇入錯貨。艾兆禮、艾道拿及董明朗經過兩個月熟習環境後，開始嚟料，尤其在沙田，跑道夠闊，適合大顯身手。
　　
睇騎師有冇鬥志，其中一項為睇入位多唔多。一場馬只得一隻W，當然搏甩髀未必掂。但二三四名呢？若馬有實力，騎師交得準，必會有多匹可以入到。以上三位騎師正是。
　　
終於上周日爆發，三人共取得四W二Q一P，收穫甚豐。尤其艾道拿，殺埋二級賽精英碗。
　　
至今為止，三位仍不似潘頓及布文般孭飛，有分頭，各位應趁「風光好」多留意。
　　
剛剛一戰，又有一事要記存，勿因見郭富城出現就以為博馬，瞓身WP。
　　
當日城城呼朋喚友入場，陣容鼎盛，不過我一睇，非常唔對路，「舞林密碼」竟有七倍，而方廄當日「拍烏蠅」，加上此馬未跑過千四米，種種跡象顯示——瓜得！當然冇買。不過，可能仍有馬迷見城城就瞓落去WP，真係喊都無謂。
　　
今晚全泥宴，唔好玩都要玩，支持善舉嘛！
　　
「軟硬鞭」潘頓連輸十六隻大熱，畀人柴到甩肺，尤其輸「金鑽貴人」，被指陣上玩「東張西望」。今晚仲唔知衰，贏馬交代？我選兩隻心水：一、「盈嵐」。周俊樂有得試閘冇得騎，擺明搵潘頓博；二、「自強不息」，上仗大勝加六分，四歲馬，未止步！