【曾智華專欄】做熟客，愛「照舊」

人乃感情動物，故此個個如是，對待有感情者與冇感情者，當然很大分別，除非你是變態的，連三九唔識七的都「親熱」一番。經營食肆者也如是。
　　
不少老友問：「碌Sir，點先可以食到好嘢？」
　　
秘訣甚多：一、遇到好的廚功及服務，多點表揚；二、對廚師及服務員要多多尊重，主動顯示禮貌；三、貼士畀在頭，切忌有種——睇你對我點，先決定畀幾多貼士。這種想法，即「你對我先好，我才會對你好」，一般人皆如此。但若能倒轉，變不論你對我如何，我都會先對你好，這樣的話，會有神奇化學效果！呢招小弟從倪匡叔身上學到，終身受用。
　　
以上三樣做齊後，若你對目標餐館喜歡，就會變第四項——做熟客，經常幫襯，培養感情。
　　
一旦你與廚師及服務員有感情，關係就會昇華到——有乜好嘢，先留畀你！
　　
成為熟客，不會是三朝兩日的事，必須長時間互相欣賞，才會去到一個「特別境界」。
　　
記住，切勿財大氣粗，以為純靠掟錢（菜價、貼士）會得到尊重。將心比己，自會明白。
　　
我非常享受做熟客，尤其朝朝幫襯的茶記，有無盡親切及歸屬感。
　　
朝朝準時七點，就會夾著大疊報紙出現，在同一張枱，做同一套動作——擺陣，將手機、托架、外賣盒、大蕉（每日一隻）、水壺、水杯全部排列好，才開始歎。
　　
經理梅姐態度親切，必問：「碌Sir，係咪照舊？」一句「照舊」，已有無盡默契！
　　
我的「照舊」，是A餐：米粉走湯（帶走做午餐）、走火腿（人造肉，咪搞）、多士走油（減卡路里）、雙太陽蛋及奶茶多奶！
　　
簡簡單單要記咁多嘢，若非熟客，豈能如此？「照舊」之後，就開始兩小時味蕾（早餐）及腦袋（吸收報章內容）快樂之旅。朝朝如此，正！