【曾智華專欄】馬有，望空，爆得

今日標題講邊個？法國仔賀銘年是也！講佢，因賀仔本周三爆咗隻七十五倍巨冷「馬有運」，位置都派一百三十元，極度誇張！
　　
賀銘年三十二歲，2019年開始來港，睇佢在法國戰績，認真平平無奇，最巴閉只在2012年贏過法國打吡，之外冇再贏過一級賽了。來港幾年，至今也只得八十一場頭馬，在香港屬中下游騎師。
　　
點解中下游？因佢騎功整體甚渣，由搶閘、走位、步速控制到掌握馬匹節奏全部普通裝，絕沒高手風範及功力。
　　
不過，佢有一味正是其他騎師冇的，若練馬師知道任何馬食呢招，就爆得！
　　
係乜？正是最後一百米左右手狂抽前後狠鞭。大家想欣賞，易，睇返佢今季贏出的兩場終點前點跑就知，一隻是「閃電烈馬」，另一隻是「馬有運」。
　　
賀銘年今季出賽二十八次，正牌Win Or Nothing騎師。二三四位空白一片，只兩W。
　　
但論派彩，你投注二百八十元，派近八百五十元，幾倍利潤呀！大家記存啦。
　　
明日又有級制賽，二級跑千二米，精英碗，總獎金五百三十五萬元。
　　
六隻馬參賽，會否又中——高班、讓磅、馬少＝爆冷定律呢？今次難咯！因「金鑽貴人」已熱身一次，面對高獎金賽事，點都要去馬嘞。
　　
不過，睇嚟呢隻短途馬王實力經已Peak（摸頂）咗，難再進一步。相反，「維港智能」仍在不斷上升中，若前者太熱，咁就用後者二重彩行頭可也。
　　
呢場馬排位時，只得三位騎師落名，包括潘頓、田泰安及巴度。意即其他三匹為臨時拉伕，唔荒會爆得去邊。巴度隻「順勢而飛」大蝕分，應冷，但仍要跑，為乜？如此，咁就買「金鑽貴人」、「維港智能」及「順勢而飛」複式二重彩好了，博有得嗌：「上上上！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。