【曾智華專欄】《AV帝王》勁出位

感謝影視平台的出現，從此我就似擁有一間超級市場，隨時入去，都可以取得喜歡的用品，更多可能是初面世時錯過的，總能夠在內裏一角找到。
　　
男人，有幾多個唔睇AV？問都多餘！尤其讀男校的，更早沉迷。我不例外，但從來唔明點解日本AV咁犀利，犀利到養起十萬計從業員，而其出口也為日本賺來天文數字外匯。直至上月舊同學「鹹蛋M」問：「喂，有冇睇過《The Naked Director》？好正㗎，未睇快睇，一口氣煲晒佢啦！」
　　
M佬中學開始已是著名色情狂，佢介紹，當然要睇！一睇似被磁石吸住，直踩十六集，並非因性愛場面（網上大把），而是真人真事的劇情極吸引。劇中描述日本AV帝王村西透的經歷，的確夠傳奇。佢由調酒師及英語教材推銷員開始，慢慢變為名震日本的AV帝王。全盛時期，不但批發色情雜誌及影帶，更擁有一百六十間店舖，年銷額達一百億日圓！
　　
點解佢咁勁？能人所不能？第一，有無限出位色情想像力；第二，擁有三寸不爛之舌及一張油嘴，不時𠱁得外表清純女生願為AV片徹底演出（以天文數字現鈔作引誘）；第三，搵命博，曾經七次被捕，包括在美國，亦出入監獄多次。
　　
衛道之士當然指斥佢敗壞道德，毒害社會風氣。但現實中，村西透為日本AV製作開拓出全球市場，創造了一場革命，將原本是色情片發源地的歐美，遠遠比下去。
　　
劇集令我最感興趣，為發覺飾演AV帝王的山田孝之，乃一個有社交恐懼症者，害怕公開發言。但片內佢則號令如山，將百計AV女郎操控自如，正牌膽生毛一族。
　　
總結，值得睇，無論你是否喜歡AV片。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。