【曾智華專欄】江灼滿廚功好得

擒賊先擒王，「擒食先擒廚」！小弟為食成性，不停自己日逛夜逛周圍貢之外，更廣布線眼，叮囑老友們，一發現邊間正或邊位大廚功力高，立即通知。先自己試一次，若得，就拉大隊去欣賞可也，因為快樂是要分享的。
　　
由細到大，受先母影響，極之喜歡食粥，但現今香港好粥難求，大部分老牌名店去到第二代，水準已今不如昔，加上部分無心經營，服務及衛生情況麻麻， 有點趕客。
　　
幸而近年發覺旺角新世紀廣場小皇府，生滾粥極高水準，尤其及第粥內的豬膶，新鮮起沙厚切，頗難尋。一直以為此店強項，只得粥粉麵及點心，直至⋯⋯直至老友九叔問：「碌Sir，有冇試過小皇府私房菜？佢大堂樓面後面有間房，只做訂位。」
　　
吓？咁就拉大班快樂傳媒老是佛殺去喇。
　　
之前一個月訂位，聲明要試大廚撚手出品。老闆仔Raymond傳來菜單：粥水白灼黃沙膶、藤椒鴨舌、金沙百花九肚魚、昆布海草大山地煲豬橫脷豬粉腸豬踭、白雪藏雙金龍（龍蝦）、百里香草紅酒燴牛肋條、金沙脆米星斑球、錦繡蝦籽燒野菌、葱油醬燒新鮮雞、龍蝦頭爪拆肉泡飯、紅豆沙湯圓、薑汁千層糕。
　　
一餐既罷，感覺是滿足、滿足、大滿足！如此高水準，當然要求大廚亮相，接受鼓掌致謝，拍照留念。
　　
身形豐滿的靚仔總廚，名江灼滿，咦⋯⋯年紀只四十左右，竟然可以炮製出極品火候的昆布海草大山地湯，認真唔簡單。須知這類湯因太煩（尤其清洗粉腸），已絕少菜館願做，較好的只有名店合時小廚，如今江師傅弄出的一煲，水準過之而無不及。
　　
今日特此開名讚揚，好快又再去欣賞。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。