【曾智華專欄】老婆出現大威力

星島集團旗下的直播節目《賽馬日在線》，小弟不停推介馬友睇，點解？過癮囉。
　　
馬會官方節目畫面最靚，資料最齊，但主持人個個四平八穩，唔敢亂講不止，搞吓笑都冇，雖未算沉悶，但賽馬是娛樂一種，過分正正經經，有點趕客。
　　
《賽馬日在線》勝在幾位主持各有角色又夠生鬼，黃以文老總負責指揮交通維持秩序，有主持過位即兜。安西教練大情大性拍爛枱，我見過佢真人，右手曾駁骨，因曾拍到斷咗，真誇張。棟哥畀貼士馬雖然賠率熱啲，但實牙實齒經常中。兩位女主持Win姐與叻姐斯斯文文，冇煙屎聲，原來叻姐為藝術歌曲愛好者，不時演出，難怪氣質高雅。
　　
最「鬼祟」零零亨，負責𥄫實沙圈，最煞食為睇人妻，即係乜？即係凡騎練有老婆大人現身捧場即報，因多數搏甩髀！
　　
心理好易解釋，男人個個愛威，尤其自己女人面前，邊個想瘀想輸？故此零零亨一見騎師老婆落沙圈，即報，多數中。呢呢，上周日潘頓贏兩隻，兩場皆見佢老婆大人在沙圈現身，與老潘吱吱噚噚。
　　
最可惜當日零零亨走咗隻大雞，為漏提意大利籍猛將艾兆禮，老婆出現，第三場W出「我為您」，立即與老婆大人嘴個不停。嘩，仲唔係「英雄好漢，胸懷大義」？果然，「你知我得」又入Q，然後尾場更犀利，殺埋二十七倍大冷「幸運有您」！
　　
零零亨，你咪只識𥄫潘頓老婆得㗎！
　　
好嘞，今晚又有九場玩。
　　
今季馬迷最高興為見到本地牌仔鍾易禮，騎功脫胎換骨，表現眼前一亮。不過，可能師傅告東尼唔想佢過分頭大，冇乜好馬畀佢騎。
　　
一於捧佢兩隻外線馬——「精妙星」及「最佳拍檔」啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。