【曾智華專欄】要求/人工皆天咁高

過去兩年香港人才「雞飛狗走」，搶極都填唔返個大氹。單論令人人羨慕的鐵飯碗（冇乜機會被炒）公務員，嘩！原來去年超過一萬人離職，當中約四千人自己「唔玩」。最令人側目為一向被視為天子門生，隨時可以升到做特首的AO職系，竟有破紀錄的三十六人辭職。
　　
AO乃制定政策者，也是管治的骨幹，咁多人「起身」，你話冇影響就呃人。
　　
栽培一個AO，由新丁到首長級，雖不是天文數字，但幾百萬元至上千萬元冇乜走雞！咁就拍拍屁股走人，究竟點解？公務員事務局有冇一個詳盡分析？再諗方法補救呢？
　　
其實單看薪酬數字，新丁AO的水平真係高得「驚人」。這點，時事評論員黃麗君上周已大大聲指出，實在太過「堅離地」。
　　
究竟幾多？一上工就月薪超過六萬蚊！乃一般大學畢業生平均薪酬的三倍半！
　　
若果比起三十年冇加過人工的「傳媒人」（電視電台報紙），更是驚人的四倍或以上。
　　
同是大學畢業，可能來自同一系，甚至可能智慧及辦事能力相若，一起步就差四倍？
　　
黃麗君大喊「堅離地」，也不是冇理由。更甚是基本上公務員人工年年加（除特殊三兩年外），有升就冇降，如此，AO就與外邊世界的薪酬水平越拉越遠了。
　　
其實較公平是將入職基數調低，然後有表現時升級，再調高薪酬，更具鼓勵性。
　　
人比人，加上先天妒忌心，故歷年AO都被不少外人及同事針對，背後揶揄：「AO喎，收咁高人工，有乜本事先？唔該騷Quali！」我唔想聽到及見到，但也覺反應正常。不過，當你羨慕AO高人工時，卻不少選擇離職，點解？相信份工「有冇意義」遠比多三兩萬元重要！